Лиганың әр маусым қорытындысы бойынша табыстайтын жүлделерімен таныстыруды жалғастырамыз.
Еске салайық, әр жүлде Қазақстан футболының белгілі тұлғаларының құрметіне аталған. Маусымның үздік медиа-қызметіне берілетін сыйлық Диас Омаровтың есімімен аталады.
Диас Ілиясұлы Омаров – кеңестік және қазақстандық футболшы, спорт журналисі әрі комментатор.
Ол футболды бала кезінен жақсы көріп, белгілі бапкер Георгий Козелькодан тәлім алды. 1959 жылы Омаров «Қайрат» сапына қабылданды. Алматы клубының негізгі құрамында жиырмадан астам матч өткізіп, үш гол соқты.
Кейін Омаров өзінің тағы бір қырын – журналистік талантын ашты. Барлығы команданың қабырға газетінен басталды, ал кейін оған «Советский спорт» газетіне материал жазу ұсынылды.
Диас Ілиясұлы бүкіл өмірін журналистикамен байланыстырып, қазақстандық спорт репортаждарының танымал дауысына айналды. Ол өз дәуірінің басты спорттық додаларын, соның ішінде Олимпиада ойындары мен әлем чемпионаттарын баяндады.
Айта кетерлігі, Қазақстан футбол чемпионаты тарихындағы алғашқы матчтың репортажын жүргізген де дәл Омаров еді.
Диас Ілиясұлы Қазақстандағы спорт журналистерінің тұтас бір буынына тәлімгер әрі үлгі болды. Оның соңғы репортаждық жұмысы 2019 жылы өткен «Қайрат» пен «Пахтакор» ардагерлерінің матчы болды. Осылайша, ол сүйікті кәсібіне жарты ғасырдан астам уақытын арнады.
Freedom QJ League маусымының үздік медиа-қызметі жүлдесінің иегерлері:
2023 жыл – «Ақсу».
2024 жыл – «Астана».
2025 жыл – «Атырау».
(0)(0)(0)(0)(0)(0).webp)
