Сабина Айтчанова – Freedom QJ League W турнирінің үздік қорғаушысы!

Қазан айында небәрі 14 жасқа толған Сабина маусымдағы барлық 14 матчқа қатысып, бір гол соқты және бір нәтижелі пас берді. Сонымен қатар ол 196 додадың 122-сін (62%) жеңіп, 73 рет допты қайтарып, 176 рет допқа ие болды. Айтчанова 374 пастың 223-ін дәл жеткізді (60%).

Лиганың барлық турнирлерінде «ең пайдалы ойыншы», «үздік қақпашы», «үздік қорғаушы», «үздік жартылай қорғаушы» және «үздік шабуылшы» атанған спортшыларға серіктес Freedom Bank тарапынан 200 000 теңгеден сыйақы беріледі.

«Бұл мен үшін өте күтпеген жаңалық болды. Қуаныш пен үлкен қанағат сезімі бар. Осы сәт маған атқарған еңбегімнің еленгенін сездірді. Өзіме де, командамызға да мақтанамын. Чемпионат бойы қолдау көрсеткен барлық жанға алғыс айтамын.

Маусымды жақсы бастадық, кейін сәл босаңсып, жеңілуге тиіс емес матчтарда ұпай жоғалттық. Кейін қайта жиналып, соңғы төрт ойында жеңіске жеттік — бұл бізді жүлделі орынға алып келді. Соңғы турдағы «Ақтөдеге» қарсы жеңіс біз үшін шешуші болды.

Келесі маусымдағы мақсат – жаңарған құраммен коммуникацияны жолға қойып, бір қадам да артқа шегінбеу. Жаңа команда, жаңа жеңістер, жаңа эмоциялар күтіп тұр.

Ең есте қалған сәт – маусым ашылу матчы. Мыңдаған жанкүйер, жоғары деңгейдегі ұйым — сол күні біз туралы бәрі айтты.

Сыйақыны қалай жұмсайтынымды әлі ойламадым, өйткені бұл марапат мен үшін күтпеген болды», – деді Сабина сұхбатында.

«Келер жылы Лигада алғаш рет дебют жасайтын кіші қыздарға айтар кеңесім: ешқашан берілмеңдер, соңына дейін күресіңдер. Футболды алдай алмайсыңдар. Ең бастысы – алаңда барыңды салу. Ауырсыну өтеді, күш қалпына келеді, ал жеңілістің сезімі мәңгі қалады», – деп қосты ол.