ССБ мамыр айының үздік ойыншылары мен бапкерін анықтады

Freedom QJ League U-17: Рахман Аман («Ордабасы»)

Шымкенттік ұжым мамыр айындағы төрт турдың бәрінде жеңіске жетсе, Рахман осы табысты жолда аянбай тер төкті. Бес гол соғып, екі нәтижелі пас берген футболшының көрсеткіші сөзімізге толық дәлел.

Freedom QJ League U-16: Максим Бонет («Шахтер»)

«Кеншілердің» жартылай қорғаушысы мамырдағы төрт матчтың үшеуінде бір-бірден гол соқты — қарағандылықтар бұл кездесулердің бәрінде үш ұпайды қанжығаға байлады. Сонымен қатар оның еншісінде «Ақтөбеге» қарсы ойында жасаған нәтижелі пасы бар — Максимнің дәл осы «1+1» жүйесі бойынша жинаған ұпайлары «Шахтерге» ең төменгі есеппен маңызды жеңіс сыйлады.

Freedom QJ League U-15: Артур Гарифуллин («Тобыл»)

«Тобыл» форварды жаңа маусымның басты жаңалықтарының біріне айналды — қазір оның еншісінде 11 гол бар, оның 8-ін Артур мамыр айында соқты. Мұнымен қоса, 14 жасар шабуылшы екі нәтижелі пастың да авторы атанды.

Freedom QJ League B: Алексей Побережный («Жайық»)

Оралдық ұжымның хавбегі Freedom QJ League B турнирінің алғашқы төрт турында екі гол соғып, бір нәтижелі пас берді. Оның командасы 12 мүмкін ұпайдан 12 ұпай жинап, турнир кестесінде көш бастап тұр. Бұл жетістікке Алексейдің қосқан үлесі қомақты.

Мамыр айының үздік бапкері: Руслан Жәңгіров («Жайық»)

Жоғарыда айтып өткеніміздей, «Жайық» жаңа маусымды сәтті бастады — Руслан Жәңгіровтің шәкірттерінен әлі ешбір ұжым ұпай тартып ала алған жоқ. ССБ таңдауының дәл осы маманға түсуі заңдылық.


Сәуір айының қорытындысы бойынша Тамерлан Сарсымбаев («Қайрат», U-17), Мирон Ищенко («Атлетико», U-16) және Санжар Байдәулетов («Ақтөбе», U-15) үздік атанған болатын. Ал үздік бапкер аталымы «Жас Қыран» U-18 командасының жетекшісі Олег Трофимовқа бұйырған еді.

Айта кетейік, флагмандық турнирде үздік ойыншы әр турдың қорытындысы бойынша анықталады. Алғашқы уикэндтен бастап бұл атаққа Әдият Отарбек («Ордабасы», I тур), Даниил Нуржанов («Тобыл», II тур), Расул Акимов («Шахтер», III және V турлар), Никита Лисохмар (ҚФФ Академиясы, IV тур) және Аян Аманжолов («Ақтөбе», VI тур) ие болды.