Тамила Бактиярова: «Freedom QJ League үлкен спорттың рухын сыйлайды»

Маусымда ол 14 матчтың 13-іне қатысып, 144 рет допқа бірінші жетті, 48 рет допты тартып алып, 156 жекпе-жектің 98-ін (63%) жеңіп алды. Сонымен қатар 453 пас беріп, олардың 314-і дәл (69%) шықты, ал үшеуі голға алып келді.

Тамила өткен маусым туралы әсерімен бөлісіп, Лига жүргізіп отырған медиа-жұмыстың маңыздылығын ерекше атап өтті.

– Маусым мен үшін өте жақсы өтті. «Қайрат» – менің командам, біз расымен бір отбасы секілдіміз. Жеңіске жету оңай болған жоқ, бірақ бірінші орын үшін ұзақ әрі табанды дайындалдық. Чемпиондыққа қол жеткіздік – бұл біз үшін үлкен жетістік.

Айта кетейін, Лигадағы медиа-сүйемелдеу деңгейі өте жоғары. Матчтардың бірнеше камерадан түсіріліп, спорттық арналарда көрсетілуі – үлкен спорттың атмосферасын сездіреді, футболды анағұрлым кәсіби етеді. Сұхбаттар мен талдаулар қосымша мотивация береді, ерекше орта қалыптастырады. Бұл – ойыншылар үшін керемет тәжірибе.

Freedom QJ League әлеуметтік желілерімен жасалатын бірлескен жарияланымдар да өте жағымды әсер қалдырады. Бұл сенімді арттырып, еңбегіңнің еленіп жатқанын сездіреді. Адамдар танып, ойындарға қызығып, нәтижелерді бақылап отырады. Футболшы үшін бұл маңызды, өйткені бүгінде медиялық танымалдық – кәсіби дамудың бір бөлігі.