Черноморец жолы: 13 жастағы дебюттан Қазақстан U-17 құрамасына дейін

Тарихи дебют

Роман 2024 жылы Лига тарихындағы ең жас дебютант атанды. Freedom QJ League U-17 турнирінің 14-туры аясында «Шахтерге» қарсы матчта негізгі құрамда алаңға шыққан сәтте оның жасы небәрі 13 жас 10 ай 3 күн болған еді.

Жасөспірімдер футболында әрбір қосымша жыл физикалық тұрғыдан үлкен айырмашылық тудыратынын ескерсек, бұл – өте әсерлі жетістік. Черноморец алғашқы таймды толық өткізіп, үзілісте ауыстырылды.

Freedom QJ League U-17 MVP

2025 жылы Лигаға 2010 жылы туған ойыншылар қосылғанымен, маусымаралық кезеңде небәрі 14 жасқа толған Черноморец U-17 құрамында қалды.

Ол сенімді толық ақтады: 20 матчта 21 гол және 6 нәтижелі пас, турнирдің үздік сұрмергені және ең құнды ойыншысы атағы. MVP жүлдесімен бірге ол Лиганың серіктесі Freedom Bank тарапынан 200 000 теңге сыйақы алды. Роман маусымның басты хайлайты ретінде 18-турда «Ордабасы» қақпасына соққан жеңіс голын атады.



Еуропалық аренада

Роман тек Лигада ғана емес, халықаралық деңгейде де көзге түсті. Өткен жылы ол Қазақстанның U-17 құрамасы сапында Еуро іріктеу матчтарында дебют жасады. Үш кездесудің барлығында ойнап, Албания қақпасына маңызды гол соқты – дәл осы 2:1 есебіндегі жеңіс командаға топта екінші орын алуға мүмкіндік берді.

Ақпан айында ол U-17 құрамасымен Даму кубогының жолдастық турниріне қатысып, Тәжікстанға гол соқты. Сондай-ақ наурыз айындағы Еуро іріктеуінің элиталық кезеңінде де алаңға шықты.

Айта кетейік, «Қайраттың» негізгі командасы Чемпиондар лигасының жалпы кезеңіне өткеннен кейін, клубтың жастар құрамы UEFA Жасөспірімдер лигасының тиісті жолына қатысты. Черноморец кипрлік «Пафос» клубына қарсы матчтың өтініміне енді. Ол алаңға шықпаса да, бұл сенімнің айқын белгісі болды.

Флагмандық турнирдегі жарқын бастау

Жаңа маусымды Черноморец U-18 құрамында бастады. Алғашқы екі турдан кейін ол сұрмергендер көшін бастап тұр: «Ертіс» пен «Астана» қақпасына дубль жасады. Сондай-ақ «гол+пас» жүйесі бойынша да көшбасшы (4+1).

Оның нәтижелері Fantasy QJ League ойынында да көрініс табуда – Романның еншісінде 22 ұпай бар. Ол командаласы Абылай Төлеухан және «Шахтердің» қорғаушысы Жәнібек Жайлаубекпен бірге үздік үштікте.

Қазірдің өзінде Черноморец Лига тарихындағы ең үздік 10 сұрмергеннің қатарына енді – барлық турнирлерде 25 гол. Бұл көрсеткіш бойынша көшбасшы – оның командаласы Дәулет Орынбасар (51+20), бірақ ол Романнан бір жас үлкен.

«Келесі маусымдағы мақсатым – алтын медаль жеңіп алып, жеке жүлдені қайтадан иелену», – деген еді Роман маусымаралық кезеңде. Ал алғашқы турлардың нәтижесіне қарасақ, оның да, «Қайраттағы» әріптестерінің де амбициясы жоғары екені анық.