Freedom QJ League B 13-турының матчтары қалай өткенін баяндаймыз.
«Жайық» пен «Хан-Тәңірі» «Жеңіске» жақындады
Турдың орталық матчы «Астана Аренада» өтті – «Жайық» «Жеңісті» 1:0 есебімен жеңіп, көшбасшыдан үш ұпайға дейін жақындады. Кездесудегі жалғыз голды 10-минутта Ілияс Бекмұханов соқты.
«Жеңіс» үшін бұл маусымдағы небәрі үшінші жеңіліс болды – бір қызығы, турнир фавориті үш жағдайда да гол соға алмай ұтылды. Оның үстіне астаналықтарды екі рет дәл «Жайық» жеңді: 4-турда Оралда алаң иелері 2:0 есебімен басым түскен еді.
Енді «Жеңістің» еншісінде 30, ал «Жайықта» – 27 ұпай бар. Елорда командасының ізін қуып келе жатқан ұжым турнирдегі ең үздік қорғаныс көрсеткішіне ие – 13 турда небәрі 11 гол жіберген.
Алайда турнир кестесінде 27 ұпай жинаған тағы бір команда бар – ол «Хан-Тәңірі». Алматы ұжымы Петропавлда «Қызылжарды» 2:0 есебімен жеңіп, чемпиондық бәсекеде қалды.
49-минутта Тимур Дешко есеп ашса, қосылған уақытта Мәди Асқардың автоголы матчтың нүктесін қойды. Кездесудің соңы алаң иелері үшін тіпті қиындай түсті: 84-минутта Тамерлан Әкімбек екінші сары қағазын алып, «Қызылжар» ойынды он адаммен аяқтады.
Семенюк «Оқжетпеске» матчты өзгертуге көмектесті
Көкшетау командасы есепте бірінші болып артта қалғанына қарамастан, «Атырауды» 2:1 есебімен жеңіп, қатарынан екінші жеңісіне қол жеткізді.
Қонақтар 22-минутта Әлихан Серікқалидың голының арқасында алға шықты. Бұдан кейін есеп ұзақ уақыт өзгермеді. Екінші таймда көкшетаулықтар небәрі екі минуттың ішінде ойын барысын төңкеріп жіберді. 71-минутта Даниил Семенюк гол соқса, 73-минутта алаңға небәрі үш минут бұрын шыққан Дінмұхамед Жақыповқа нәтижелі пас берді.
«Оқжетпес» 23 ұпаймен төртінші орынға тұрақтады. «Атырау» 15 ұпаймен жетінші орында қалды.
Дәулетұлының маңызды хет-тригі
Балпық биде «Жетісу» «Елімайды» 3:2 есебімен жеңді. Алаң иелерінің үш голын да Айбын Дәулетұлы соқты – ол 20, 80 және 83-минуттарда мергендігімен танылды.
Дегенмен талдықорғандықтарға жеңіс оңай келген жоқ. Дәулетұлының алғашқы голынан кейін көп ұзамай Григорий Копейкиннің автоголы есепті теңестірді, ал екінші таймның басында Әлібек Тұрысбек қонақтарды алға шығарды. Бірақ кездесудің шешуші бөлігі алаң иелерінің еншісінде қалды – Дәулетұлы төрт минут ішінде екі рет гол соқты.
Шабуылшы маусымдағы гол санын алтыға жеткізіп, турнирдің үздік бес сұрмергенінің қатарына енді. «Жетісу» 19 ұпаймен бесінші орында, ал «Елімай» қатарынан бесінші рет жеңілді – 12 ұпай және сегізінші орын.
«Алтайдың» матч соңындағы камбэгі
Турдағы жалғыз тең нәтиже Өскеменде тіркелді – 2:2. «Оңтүстік» Арда Мұхтаровтың (51-минут) және Әлзаир Раистің (83-минут) голдарының арқасында алда тұрды, алайда шымкенттіктер басымдықты сақтап қала алмады.
86-минутта Диас Қуанған алаң иелерінің есеп айырмасын қысқартса, 90-минутта Ахмет Қабдұлманаттың дәл соққысы қорытынды есепті белгіледі. Бір қызығы, «Алтайдың» екі голының авторы да 55-минутта бір мезетте алаңға шыққан болатын.
13 турда небәрі бір жеңіске жеткен алаң иелері үшін бұл маңызды ұпай болды, дегенмен олар соңғының алдындағы орында келе жатқан «Қызылжардан» алты ұпайға қалып отыр. «Оңтүстік» 17 ұпаймен алтыншы орында.
13-турдан кейінгі үздік сұрмерген: Жанәді Жұмабек («Хан-Тәңірі», 9 гол).
13-турдан кейінгі үздік ассистент: Нұралы Сабыржан («Оқжетпес», 5 нәтижелі пас).
