Жуырда «Ордабасы» УЕФА Жастар лигасында дебют жасайды – чемпиондар жолының бірінші кезеңінде шымкенттіктерге қарсылас ретінде Минскінің «Динамосы» түсті.
Еске сала кетейік, өткен маусымда «Ордабасы» Freedom QJ League турнирін екінші орында аяқтаған болатын. Бастапқыда жолдама «Қайратқа» берілген еді. Алайда «сары-қаралардың» негізгі командасы Чемпиондар лигасының негізгі кезеңіне шыққандықтан, алматылық жастар автоматты түрде Жастар лигасының өз жолына қосылды. Осылайша бос орын күміс жүлдегер «Ордабасыға» берілді.
Алғашқы матч 26 қыркүйекте Шымкентте өтеді. Біз сіздерді алдағы еурокампанияда көшбасшы бола алатын ойыншылармен таныстыруды бастаймыз.
2024 жылғы Freedom QJ League маусымында күміс медальға үлес қосқан екі шымкенттік ойыншы қазірдің өзінде ҚПЛ-да ойнап жүр – олар Бағдәулет Нұралы мен Жасұлан Әмір. Екеуі де 18 жаста – демек, олар УЕФА Жастар лигасының алдағы маусымына қатыса алады.
Нұралы өткен жылғы Freedom QJ League маусымының үздік сұрмергені атанған. Ол 22 матч өткізіп, 22 гол соқты және 6 нәтижелі пас берді. Жоғары көрсеткіші арқасында Бағдәулет QJL All Star құрамына шақырылып, «Црвена Звездаға» қарсы ойында алғашқы таймды толық өткізді.
Сондай-ақ ол Лиганың алғашқы маусымына да қатысып, жеті ойында үш гол және екі ассист жасаған еді.
Қазір Бағдәулет негізгі командада тәжірибе жинап жүр – осы маусымда оның еншісінде Премьер-лигада 171 минут бар. Әзірге нәтижелі әрекеттері тіркелмегенімен, бәрі алда.
Ал Жасұланға келсек, қорғаушы Freedom QJ League-да екі маусым ойнады – 2023 жылдан 2024 жылға дейін. Осы уақыт ішінде оның еншісінде 42 матч бар. Өткен маусымда Әмір он нәтижелі әрекет жасады – алты гол және төрт ассист.
Айта кету керек, жазда Бағдәулет пен Жасұлан Бразилияның «Ботафого» клубында екі апталық қаралымнан өтті.
Бұл ойыншыларды УЕФА Жастар лигасында көреміз бе? Жақында білеміз.
.webp)
(0).webp){kind=logo}
.webp){kind=logo}
.webp)