Алихан Абди мен Жәнібек Жайлаубек: Fantasy QJ League 3-турыдың қорытындысы бойынша ең тиімді қорғаушылар

Фэнтези-турнирде 30 ұпайдан асырған үш футболшы бар – «Қайраттың» жартылай қорғаушысы әрі «джокері» Абылай Төлеуханның жоғары нәтижесі заңды болса, көш басында бірден екі қорғаушының болуы көпшілікті таңғалдырғаны анық.

Дегенмен бұл – факт: Fantasy QJ League-да ең тиімді ойыншылар тізімінде бірінші орында «Қайраттың» қорғаушысы Алихан Абди (36 ұпай), ал Төлеуханнан (35) кейін бірден «Шахтердің» өкілі Жәнібек Жайлаубек (32 ұпай) орналасқан. Жаңа маусымды сәтті бастаған жас қорғаушылар жайлы айтып өтеміз.

Алихан Абди – 16 жастағы талант

Абди жасына қарамастан рейтингте көш бастап тұр – ол 2010 жылы дүниеге келген, ақпанда туған күнін атап өтті. Соған қарамастан, өткен маусымды U-17 құрамында өткізіп, 18 матчта 4 гол соғып, чемпион атанған.

Биыл қорғаушы командасымен бірге келесі деңгейге көтерілді. Алғашқы үш тур «Қайрат» үшін өте сәтті өтті: «Ертіс», «Астана» және «Ақтөбені» ірі есеппен жеңіп, бірде-бір гол жіберген жоқ.

Бірінші және екінші турларда Абдиді құрамға қосу Fantasy QJ League қатысушыларына 9 ұпайдан әкелді – «Ертіспен» ойында нәтижелі пас, «құрғақ» жеңістер, допты қайтару көрсеткіштері және тұрақты ойын уақытының арқасында.

Алайда Алихан үшін нағыз жарқын сәт «Ақтөбеге» қарсы матч болды. Ол қорғаныстағы сенімді ойынымен қатар дубль жасап, команданың ірі жеңісіне зор үлес қосты. Нәтижесінде – бір турда 18 ұпай.

Айта кетерлігі, Абди Fantasy QJ League-ның ең қымбат қорғаушылардың қатарына кірмейді. Оны құрамға 6.5 Freedom-Coins-қа қосуға болады, бұл осы позициядағы ең жоғары бағадан 0.5-ке төмен.

Жәнібек Жайлаубек – футболшы-математик



«Шахтер» қорғаушысы Жәнібек Жайлаубек маусым басталар алдында 6 Freedom-Coins деп бағаланған, алайда бұл оған үш турда көптеген қарсыластарынан көп ұпай жинауға кедергі болмады.

Өткен маусымда Жәнібек U-17 турнирінде 18 матч өткізіп, 2 гол соғып, 5 нәтижелі пас берген – «кеншілердің» қола жүлдесіне маңызды үлес қосты.

Қазіргі маусымда ол флагман турнирінің алғашқы үш турында 1 гол және 1 ассист тіркеп, көп ойын уақыты мен доп қайтару көрсеткіштері арқылы жоғары орындарға көтерілді.

Жайлаубектің тағы бір ерекшелігі – ол биыл 11-сыныпты аяқтайды және математикаға ерекше қызығады.

«Бұл – екі түрлі, бірақ бірдей қызықты әлем. Футбол мен үшін тек спорт емес, бұл – құштарлық, өзімді көрсету тәсілі, жеңіс қуанышын және командалық рухты сезіну мүмкіндігі. Ал математика логикалық ойлауды дамытып, талдау жасауға және стандарттан тыс шешім табуға үйретеді. Бұл қызығушылықтарым болашақта да пайдасын тигізеді деп сенемін», – деген еді ол Лигадағы дебюті алдында.

Жәнібек кәсіби футболшы болуды мақсат етеді – оның табандылығы мен еңбегі алғашқы нәтижесін беріп үлгерді.

Өткен жылдағыдай, әр ойын аптасының ең үздік құрамын жасаған қатысушылар Лиганың серіктесі COPA.KZ ұсынған 20 000 теңгелік сертификатқа ие болады. Маусым жеңімпазы iPhone 17 алады, ал екінші және үшінші орын иелеріне сәйкесінше PlayStation 5 пен Apple Watch табысталады.

Fantasy QJ League-ның Telegram-да жеке чаты бар — онда 250-ден астам қатысушы жаңадан қосылғандарға көмектесуге дайын. Қосылыңыз және ұзақ әрі тартысты маусымның бір бөлігіне айналыңыз!

Fantasy QJ League: өзіңіздің мінсіз құрамды жинап үлгеріңіз!