Жаңа қаһармандар уақыты: Freedom QJ League B 1-турының басты сәттері

Фавориттің сүрінуі

Freedom QJ League B додасының алдыңғы екі маусымында жеңіске жеткен клуб бұл жолы маусымды сәтсіз бастады – «Жетісудан» сырт алаңда 1:4 есебімен ойсырай жеңілді.

Алаң иелері сапында ең нәтижелі ойыншы – гол соғып, нәтижелі пас берген Мұхаммедамин Байдильдин болды. Сондай-ақ Алихан Диния, Әділ Аманғазы және Айбын Дәулетұлы бір-бірден голмен көзге түсті. «Оңтүстік» сапындағы жалғыз голды Альзаир Раис соқты.

Айта кету керек, шымкенттік ұжымның құрамы өткен жылмен салыстырғанда толықтай жаңарған: биылғы маусымда Freedom QJ League B-да тек 2009 жылдан кіші футболшылар өнер көрсетуде. Бұл буын алмасуы чемпиондық бәсекені әлдеқайда тартысты етуі мүмкін.

«Атырау» Семейде жеңілді

«Елімай» – «Атырау» матчының соңғы минуттары өте тартысты өтті.

Бірінші таймда Вадим Сайбель пенальтиден есеп ашты. Ұзақ уақыт бойы командалар ойыннан гол соға алмады, алайда қосымша минуттарда бірден екі гол тіркелді. Алдымен Санжар Бекенов есепті еселесе, араға көп уақыт салмай Нұрбек Амангелді есеп айырмасын қысқартты. Қорытынды есеп – 2:1, «Елімайдың» пайдасына.

«Окжетпестің» камбэгі

Көкшетауда өткен «Окжетпес» – «Алтай» кездесуі де тартысты өрбіді. Қонақтар 31-минутта Әмірлан Балибаевтың голымен алға шықты. Алайда көп ұзамай Пётр Попадюк есепті теңестірді.

Матч тағдырын соңғы сәттерде Дінмұхамед Жақыпов шешіп, «Окжетпеске» жеңіс сыйлады.

Побережный «Жайыққа» жеңіс сыйлады

Алматыда «Хан-Тәңірі» «Жайықтан» 1:2 есебімен жеңілді. Үш голдың үшеуін де қонақтар ойыншылары соқты.

23-минутта Супьян Хасанов (ассист – Алексей Побережный) есеп ашты. Алайда бірнеше минуттан кейін Дамир Залмуканов өз қақпасына гол соғып, есеп теңесті.

Ойын тең аяқталатындай көрінгенімен, 87-минутта Алексей Побережный жеңіс голын соқты.

«Жеңістің» сенімді бастауы

Петропавлда өткен «Қызылжар» – «Жеңіс» матчы 0:5 есебімен аяқталды. Амирхан Абай дубль жасаса, Ильяс Серикбаев 1+1 көрсеткішіне қол жеткізді. Сондай-ақ Жаннұр Малтықбай мен Алихан Амандыков (пенальтиден) гол соқты.

Осылайша, бірінші турдағы бірде-бір матч тең аяқталған жоқ: тур кестесі жеңімпаздар мен жеңілгендерге тең бөлінді. Ал алғашқы нәтижелер маусымның тартысты әрі қызықты өтетініне сенім ұялатады.