Мёнхенгладбахтық «Боруссия» командасының бас бапкері Денис Хаусвальд қазақстандықтардың пенальти сериясындағы жеңісімен аяқталған QJL All Star матчын қорытындылады.
– Бұл сөзсіз өте тартысты әрі жоғары деңгейдегі матч болды. Менің жігіттерім қысымға жақсы төтеп беріп, қарсыласқа лайықты қарсылық көрсете білді – тіпті олардан бір жас кіші болғанына қарамастан.
Ойынның соңында кейбір сәттерді сапалырақ аяқтауымыз керек еді. Әрине, көрермендердің гол көргенін қаладық, бірақ қос команда да бір-біріне есе жібермеді.
Пенальти сериясын есепке алмағанда – мен үшін оның маңызы шамалы, – біз шынымен де жақсы ойын көрсеткенімізді айтқым келеді.
Матчтағы атмосфера, әрине, ғажап болды. Мұндай жанкүйерлердің алдында, әсіресе прожектор жарығында ойнау өте жағымды болды. Біз үлкен ләззат алдық. Ойын барысында бұдан алаңдамайсың, бірақ ысқырық шалынғанға дейін мұның бәрі өте анық сезіліп, ерекше әсер сыйлады.
QJL All Star командасының көптеген футболшылары Қазақстан құрамасында ойнайды, сондықтан біз олардың шеберлігімен таныс болдық. Меніңше, біз жақсы дайындалдық және жалпы ойын барысында бәрі біз күткендей болды.
Әрине, бұл матч бізге жаңа маусымға дайындалуға көмектеседі, біз үшін бұл дайындықтың қазіргі кезеңіндегі тамаша сынақ болды. Қарсылас бізді физикалық тұрғыдан да, ойын қарқындылығы жағынан да мықтап тексерді, соған қарамастан біз доппен жұмыс істеу кезінде жақсы шешімдер таба білдік.
Сонымен, Қазақстанға жасаған саяхатымыз бізге үлкен пайда әкелді, ал өткен ойын осы ғажайып сапардың тамаша қорытындысы болды.
«Хан-Тәңіріндегі» жалынды матч: QJL All Star құрамасы «Боруссияны» жеңді!
