Макридов Төлеуханды қуып жете ме? Халықаралық үзіліс қарсаңындағы Fantasy QJ League үздіктері

Фэнтези-турнирдің аралық қорытындысын шығаруға дәл уақыт: 16-турдан кейін ең көп ұпай жинаған ойыншыларға назар аударайық.

Сенімді көшбасшы орнында – Абылай Төлеухан. «Қайрат» хавбегінің еншісінде 144 ұпай бар, бірақ ол әр ойында алаңға шыққан жоқ – ойыншы 9-, 12- және 16-турларды өткізіп алды.

Екінші орында – Глеб Макридов, оның қоржынында 120 ұпай. Еске салсақ, тамыз айында «Шахтердің» джокері, Лигадағы үшінші әрі соңғы маусымын өткізіп жатқан ойыншы, тарихи минуттық рекорд орнатқан еді.

Сонымен қатар, 18 жастағы хавбек әлі де болса Дастан Сәтпаев пен Данияр Ташпұлатовтың рекордын қайталау мүмкіндігіне ие – тиісінше голдар мен нәтижелі пас саны бойынша. Қазіргі таңда Глебке алты гол мен алты ассист жетіспейді.

Макридовтың ізін ала тағы екі ойыншы келеді – Fantasy турнирінде жүзден астам ұпай жинағандар: «Қайрат» шабуылшысы Даулет Орынбасар (108) және «Шахтердің» хавбегі Нұрхан Қағазбаев (104). Сондай-ақ топ-10 қатарына кіргендер: «Ордабасы» шабуылшысы Жанәлі Есеналиев (98), «Шахтердің» Найман Сатенов (93), «Қайраттың» Аламгир Смақов (91), Әлиден Мусаипов (88), «Ертістен» Руслан Рахметов (86) және бұл тізімдегі жалғыз қорғаушы – «Қайраттың» Акежан Қалиқұлов (83).

Күнтізбеде алты тур қалды. Естеріңізге сала кетейік, әр ойын аптасының қорытындысы бойынша ең үздік құрамды жинаған пайдаланушылар COPA.KZ-тен 20 000 теңгелік сертификатқа ие болады. Fantasy QJ League ойнаңыздар – сілтеме осында!