Лига командаларының бапкерлеріне арналған семинар Астанада өтуде

Лигадағы бес турнирдің барлығына қатысушы клуб мамандары жиналып, екі тең топқа («Солтүстік» және «Оңтүстік») бөлінді. Әр топ аясында теориялық және тәжірибелік сабақтар өткізіледі.

Үш күнге созылатын оқу-жаттығу процесін Лиганың спорттық-сараптамалық бөлімі Қазақстан футбол федерациясының Техникалық орталығымен бірлесіп ұйымдастыруда. Осы арқылы бапкерлер УЕФА конвенциясына сәйкес өз лицензияларын ұзарту үшін қажет оқу сағаттарын тегін ала алады.

ҚФФ Техникалық директоры Геннадий Скуртул семинар қатысушыларына 2025-2030 жылғы білім беру бағдарламасын таныстырып, бапкерлерді оқыту бағыты бойынша алдағы жоспарлармен бөлісті.

Спорттық-сараптамалық бөлімінің өкілдері – Арсен Инкарбеков, Игорь Шпанера, Дмитрий Васильев, Жанна Мальгаждарова, Тимур Құсайынов, Дмитрий Огай, Евгений Яровенко мен Максим Шевченко – микротоптар ішінде жаттықтырушыларға көмектеседі.

Сабақтар аясындағы маңызды тақырыптардың бірі QJL All Star матчы үшін «Атлетикоға» қарсы сәтті стратегияны таңдау болды. Бұған қоса, ССБ сарапшылары Лиганың өткен ойындарын талдап, футболшылардың тактиклық-техникалық әрекеттеріндегі жаңа үрдістерді көрнекі түрде көрсетті. Сондай-ақ Лига турнирлерінің салыстырмалы талдауы жасалды.

Оқыту интерактивті форматта өтуде – бапкерлер тек тыңдаушы рөлінде шектелмей, сарапшылармен бірге сабақтарға толыққанды қатысуда.