Қыздар турнирінің өткен матчтарындағы басты оқиғаларды баяндаймыз.
Қарағандыдағы ірі жеңіс
Турдың орталық оқиғасы «Шахтер» мен «Қайрат» арасындағы матч болды. Қонақтар 11-минутта есеп ашып, үзіліске дейін 6:0 есебімен алға шықты. Кездесу қорытындысында турнирдегі әзірге ең ірі нәтиже тіркелді – 0:11.
Алматылық команданың бірден екі футболшысы хет-трик жасады – София Ягудина мен Елизавета Остертак. Милена Николенко дубль жасап, сонымен қатар үш нәтижелі пас берді. Айя Муттари, Жания Махаш (пенальтиден) және алаңға қосалқы құрамнан шыққан Ясмина Тохниязова бір-бір голдан соқты.
Осылайша, «Қайрат» алты турда 31 гол соқты. Ал сегіз ұпайы бар «Шахтер» бесінші орынға түсті: «золушкалар» «Ақтөбе» және «Тобылмен» бірдей ұпай жинағанымен, қосымша көрсеткіштер бойынша артта келеді.
Пазылдың дублі «Астананы» бірінші орында қалдырды
Елордалық команда Ақтөбеден үш ұпаймен оралды – 0:2. Екі голды да Асыл Пазыл соқты: ол 33-минутта есеп ашып, 78-минутта матчтың қорытынды нәтижесін белгіледі.
Шабуылшы үшін бұл маусымдағы бес матчта соққан бесінші голы болды – сұрмергендер жарысындағы екінші нәтиже. «Астана» турнирде әлі жеңілмеген жалғыз команда болып қала береді және ең үздік қорғаныс көрсеткішіне ие – алты турда небәрі үш гол жіберді.
16 ұпай жинаған елордалық команда бірінші орнын сақтап, «Қайраттан» бір ұпай алда келеді. «Ақтөбе» бұл жеңілістен кейін үшінші орында орналасқан.
«Ертістің» алғашқы жеңісі
Қызылордадағы матчта ұзақ уақыт бойы есеп ашылмады, алайда 74-минутта Полина Арланова гол соғып, «Ертіске» жеңіс әкелді – 0:1.
Павлодарлық команда үшін бұл маусымдағы көптен күткен алғашқы жеңіс болды: бұған дейін оның еншісінде алғашқы турдағы бір тең ойын мен қатарынан төрт жеңіліс бар еді. Енді «Ертіс» төрт ұпаймен алтыншы орында келеді.
«Қайсар» қатарынан бесінші рет жеңіліп, үш ұпаймен турнир кестесінің соңғы орнында қалды. Бір қызығы, бұған дейінгі барлық жеңілісінде қызылордалықтар дәл бес голдан жіберген еді – бұл жолы есеп минималды болғанымен, командаға ұпай әкелмеді. «Қайсар» әзірге турнирдегі ең аз гол соққан команда – алты турда төрт гол.
«Ордабасының» қатарынан төртінші тең ойыны
Шымкентте «Ордабасы» мен «Тобыл» тең түсті. 16-минутта Амура Қарабаева есеп ашты, бірақ үзілістен кейін алаң иелері ойын барысын өзгертті: 47-минутта капитан Балнұр Ергешбек пенальтиді сәтті орындаса, 54-минутта алаңға қосалқы құрамнан шыққан Диана Ситникова шымкенттік команданы алға шығарды. Матчтың қорытынды есебін – 2:2 – «Тобылдың» жартылай қорғаушысы Алина Сартаева 75-минутта белгіледі.
«Ордабасы» қатарынан төртінші турда тең ойнады. «Ертістің» жеңісінен кейін шымкенттік команда осы маусымда әлі жеңіске жетпеген жалғыз ұжым болып қалды – төрт тең ойын және екі жеңіліс.
6-турдан кейінгі үздік сұрмерген: Милена Николенко («Қайрат», 7 гол).
6-турдан кейінгі үздік ассистенттер: Жібек Марат («Астана») және София Ягудина («Қайрат») – 5 нәтижелі пастан.
