U-18 командаларының алдағы матчтарынан не күтуге болатынын талдаймыз.
«Тобыл» – «Қайсар»
Чемпионаттың алғашқы жартысының қорытындысы бойынша «Тобыл» бәрінен аз гол соқты (11 турда небәрі 10 доп), алайда өзі де тек 10 гол жіберді – қорғаныс көрсеткіші бойынша «Қайрат» пен «Шахтер» ғана алда тұр. Нәтижесінде доп айырмасы нөлге тең турнирдегі жалғыз команда алтыншы орынға жайғасты. Бұл нәтижеде қақпашы Даниил Нұржановтың үлесі зор: ол соққылардың 82%-ын қайтарды – бұл Лиганың негізгі қақпашылары арасындағы үздік көрсеткіш.
Ал «Қайсар» қатарынан үш матчты тең аяқтады. Олардың қатарында Ақтөбедегі 4:4 есебімен аяқталған голға толы кездесу де бар. «Қасқырлар» қостанайлықтарға қарағанда көбірек гол соққанымен (16 доп), әлдеқайда көп гол жіберді – 32.
Қызылордадағы алғашқы кездесуде барлығын жалғыз гол шешкен еді: Лига тарихындағы мыңыншы матчта «қасқырлар» 1:0 есебімен жеңіске жетті. Бұл жолы «Тобыл» Риза Жұмағұлсыз ойнайды – қорғаушы қызыл карточка алды. Олег Лотовтың командасы қарымта қайтара ала ма?
«Астана» – «Каспий»
Елордалық команда өз жанкүйерлерінің алдында есесін қайтаруға барын салатыны анық. Өткен турда «Астана» «Ордабасыдан» 1:4 есебімен ойсырай жеңіліп, жетінші орынға түсіп қалды.
Ал «Каспий» турнир кестесінің соңғы орнында тұр – екі жеңіс және тоғыз жеңіліс. Дегенмен бірінші айналымда елордалықтар Ақтаудан 2:1 есебімен жеңіске жетіп қайтқан еді, сондықтан оңай матч болады деп айтуға келмейді.
Алдағы ассистенттер текетіресі де назар аударуға тұрарлық: «Астана» ойыншысы Амандық Хамидуллин бес нәтижелі паспен екі қарсыласымен бірге турнирде бірінші орынды бөлісіп тұр. Ал «Каспийдің» негізгі ойын ұйымдастырушысы – Әлихан Жұмабай (2+4).
«Жас Қыран» – ҚФФ академиясы
«Жас Қыранның» нәтижесі төмендеп кетті: соңғы төрт турда небәрі бір ұпай. Алматылықтар әлі де төртінші орында тұрғанымен, қуғыншылар жақындап қалды: «Ақтөбе» бір, «Тобыл» екі ұпайға қалып келеді, ал үшінші орындағы «Ордабасымен» арадағы айырмашылық үш ұпайға дейін өсті.
ҚФФ академиясы өткен турда Қостанайда «Тобылдан» 1:2 есебімен жеңіліп, тоғызыншы орында қалды. Бұл командалардың алғашқы кездесуі тартысты өтіп, «Жас Қыран» 3:2 есебімен жеңіске жеткен еді. Бұл жолы қай команданың шабуылы өткір болады?
«Ертіс» – «Қайрат»
«Қайрат» маусымды мінсіз өткізіп келеді: 11 турдағы 11 жеңіс, 48 соғылған және төрт жіберілген гол. Ал бірінші айналымдағы кездесу маусымның әзірге ең ірі жеңісімен аяқталды – 12:0.
Алайда «Ертіс» барлық ұпайын өз алаңында жинағанын атап өткен жөн: екі жеңіс және екі тең ойын. Ал сырт алаңда павлодарлықтар алты рет жеңілді. Өткен турда олар өз алаңында «Каспийден» 3:1 есебімен басым түсіп, енді көшбасшыға лайықты қарсылық көрсетуге тырысады.
Алаң иелеріне қарсыластың дисквалификациялары да көмектесуі мүмкін: «Қайрат» бірден екі ойыншысынан айырылды. Шабуылшы Нилеш Шармамен қатар Әлихан Әбді де жазасын өтейді. «Сары-қаралардың» негізгі қорғаушысы алаңда 900 минуттан астам уақыт өткізіп, «гол+пас» жүйесі бойынша 3+1 көрсеткішін тіркеді. Fantasy QJ League қатысушылары құрам жасақтаған кезде бұл жағдайды ескергені жөн.
Дегенмен қонақтардың шабуылы өткірлігін жоғалтпауы тиіс: Дәулет Орынбасар мен Роман Черноморец он голдан, Абылай Жылқайдар жеті гол соқты. «Ертіс» қақпашысы Арсений Катьетовті тағы да қызу кеш күтіп тұрғаны анық: оның еншісінде қазірдің өзінде 62 сейв бар – бұл Лигадағы ең жоғары көрсеткіш.
«Тараз» – «Шахтер»
«Шахтер» екінші орында сенімді келе жатыр: 26 ұпай, сегіз жеңіс және екі тең ойын. «Кеншілер» жалғыз жеңілісін «Қайраттан» қабылдады. Өткен турда қарағандылықтар «Жас Қыранды» 2:0 есебімен жеңіп, көшбасшыдан жеті ұпайға қалып келе жатқанына қарамастан, қарқынын бәсеңдетер емес.
Қонақтардың негізгі қаруы жақсы белгілі – ол Расул Акимов. Жартылай қорғаушы 12 голмен мергендер жарысында сенімді көш бастап, «гол+пас» жүйесі бойынша да бірінші орында тұр – 16 ұпай.
Ал «Таразға» қиын болады: оңтүстік командасы қатарынан төрт матчта жеңіліп, енді сары карточкалар санының артуына байланысты бірден екі футболшысынан айырылды. Олар – жартылай қорғаушы Ахан Ерболұлы мен команданың екінші үздік сұрмергені, шабуылшы Мұхаммет Шүкіралиев («гол+пас» бойынша 4+2). Алаң иелерінің басты үміті – 6+2 көрсеткіші бар Расул Нұрманбай. Еске салайық, бірінші айналымда «Шахтер» Қарағандыда «Таразды» 2:0 есебімен жеңген еді.
«Ақтөбе» – «Ордабасы»
Жексенбінің орталық матчында дәл қазір жақсы қарқын алып келе жатқан екі команда кездеседі. «Ордабасы» қатарынан үш рет жеңіске жетіп, үшінші орынға орнықты. Ал «Ақтөбе» алты турдан бері жеңілген жоқ: үш жеңіс және үш тең ойын.
Турнирлік жағдай анық: алаң иелері жеңіске жетсе, қола жүлделі орыннан бір ұпай ғана қалып қояды. Қонақтар жеңсе, командалар арасындағы айырмашылық жеті ұпайға дейін ұлғаяды.
Кездесудің сәнін Лиганың үздік ассистенттерінің текетіресі кіргізбек. «Ақтөбеден» Аян Аманжұлов пен «Ордабасыдан» Әділбек Тұрдах бес нәтижелі пастан беріп, бірінші орынды бөлісіп тұр. Олардың қатарында «Астана» ойыншысы Амандық Хамидуллин де бар. Сонымен қатар Тұрдах жеті голмен шымкенттік команданың үздік сұрмергені атанса, Дияр Рахымжанов оған нәтижелі қолдау көрсетіп жүр – 5+4.
Сондай-ақ «қызыл-ақтар» Омар Бақтыбаевсыз ойнайтынын айта кеткен жөн: тірек жартылай қорғаушысы сары карточкалар санының артуына байланысты дисквалификацияланды. Бірінші айналымда «Ордабасы» өз алаңында 2:1 есебімен жеңіске жеткен еді. «Ақтөбе» қарымта қайтара ала ма?
