Freedom QJ League B оныншы турының матчтары қалай өткенін баяндаймыз.
Өскемендегі камбэк
Турдың басты оқиғасы «Восток» стадионында өтіп, онда «Алтай» «Оқжетпесті» қабылдады. Үзіліске дейін алаң иелері 3:0 есебімен алда тұрды: бірнеше минуттың ішінде Дәулет Дәутбаев дубль жасаса, бірінші таймның соңында бұған дейін нәтижелі пас берген Ярослав Вишневецкий мергендік танытты.
Алайда екінші тайм ойынның барысын толығымен өзгертті. 47-минутта Әлмерек Қарбаев «Оқжетпестің» есеп айырмасын қысқартты, ал бір минуттан кейін Анар Мирзаев оны минимумға жеткізді. 70-минутта ол тағы бір гол соғып, дубль жасап, есепті теңестірді. Көп ұзамай көкшетаулықтар он ойыншымен қалды – Әмірхан Мұхтар қауіпті шабуылды тоқтатқаны үшін екінші сары қағазын алды.
Соған қарамастан, ойыншының алаңнан қуылуы қонақтарға кедергі болмады: 90-минутта Аврам Руденко «Оқжетпестің» төртінші голын соғып, «Алтайды» үміттен айырды – 3:4.
Бір матчта соғылған үш гол алаң иелерінің осы көрсеткіш бойынша маусымдағы үздік нәтижесі болды (команда он турда барлығы 9 гол соққан), алайда бұл да ұпай алуға жеткіліксіз болды. Дәулет Дәутбаев маусымдағы гол санын беске жеткізді, бірақ оның командасы бір ұпаймен турнир кестесінің соңғы орнында қалып, лигада әлі жеңіске жетпеген жалғыз ұжым болып отыр. «Оқжетпестің» еншісінде қазір 17 ұпай бар, команда төртінші орында келеді.
«Жеңістің» алты голын алты түрлі ойыншы соқты
«Астана Аренада» чемпионат көшбасшысы «Қызылжарды» 6:2 есебімен ойсырата жеңді. Бір қызығы, барлық голды әртүрлі ойыншылар соқты: Абыз Ерғалиұлы, Илья Горячих, Дәут Хусен, Ердәулет Исмаилов, Мұхаммедали Пайзолда және Нұраби Нұрлан мергендік танытты.
Қонақтар сапында Абылайхан Кенжадоев пен Сүлеман Жетпіспай гол соқты. Соңғысы пенальтиден мергендік танытып, матчты 1+1 көрсеткішімен аяқтады. 76-минутта петропавлдықтар азшылықта қалды – капитан Елнұр Орақ екінші сары қағазын алды.
«Жеңіс» 24 ұпай жинап, «Жайықтан» үш ұпайға ұзап кетті. Елордалық команда турнирдегі ең нәтижелі ұжым болып отыр – 27 гол. Сегіз ұпайы бар «Қызылжар» соңғының алдындағы орында келеді, ал жіберген 27 добы – турнирдегі ең нашар көрсеткіш.
«Жайық» пен «Хан-Тәңірінің» тең ойындар сериясы жалғасуда
Оралда турнир кестесіндегі екінші және үшінші командалар кездесіп, 2:2 есебімен тең түсті. 22-минутта «Хан-Тәңірінің» шабуылшысы Тимур Хван есеп ашты. 39-минутта Супьян Хасанов таразы басын теңестірді, бірақ үзіліске дейін Дінмұхамед Тайлан қонақтарды қайтадан алға шығарды. 52-минутта Хасанов дубль жасап, матчтың қорытынды есебін белгіледі.
«Жайық» кездесудің соңын он ойыншымен өткізді – 84-минутта Рами Жақсылық тікелей қызыл қағаз алды.
Қызықты дерек: екі команда үшін де бұл қатарынан үшінші тең ойын болды.
«Оңтүстік» қарқын алып келеді
Шымкенттік команда «Жетісуды» 4:1 есебімен сенімді түрде жеңді. 43-минутта капитан Нұрдәулет Тілеулес есеп ашты. Үзілістен кейін Әділ Аманғазы есепті теңестірді, бірақ артынша алаң иелері үш гол соқты: Әлзаир Раис, Арда Мұхтаров және қосымша уақытта қорытынды нүктені қойған Асылбек Фахриддинов мергендік танытты.
B Лигасының екі дүркін чемпионы қазір 16 ұпаймен бесінші орында келеді. Команданы «Оқжетпестен» бір, ал «Хан-Тәңіріден» екі ұпай бөліп тұр. «Жетісу» соңғы төрт матчының үшеуінде жеңіліп, алтыншы орынға жайғасты.
Атыраудағы жеті гол
Ең тартысты кездесу «Атырау» мен «Елімай» арасындағы матч болды.
Екінші минутта алаң иелерінің қорғаушысы Руслан Төленді өз қақпасына гол соғып алды. 30-минутта Нұрбек Амангелді есепті теңестірсе, екінші тайм басталғаннан кейін бірден Әлихан Серікқали «мұнайшыларды» алға шығарды.
Қонақтардың жауабы үш минутқа ғана созылды: 48-минутта Санжар Бекенов гол соқты (бұл оның маусымдағы жетінші голы және сұрмергендер жарысындағы екінші үздік көрсеткіш болды), ал 50-минутта Даниял Төлеубаев мергендік танытып, «Елімайды» 3:2 есебімен алға шығарды.
Алайда алаң иелері берілмеді. 55-минутта үзілісте алаңға шыққан Нұрсұлтан Жомарт есепті теңестірді, ал 82-минутта қорғаушы Богдан Грабко жеңіс голын соқты – 4:3.
«Атырау» үш тур қатарынан жеңілген жоқ және 12 ұпаймен сегізінші орында келеді. «Елімайда» да 12 ұпай бар, бірақ доп айырмасы жақсы болғандықтан, команда бір саты жоғары орналасқан.
10-турдан кейінгі үздік сұрмерген: Жанәді Жұмабек («Хан-Тәңірі», 8 гол).
10-турдан кейінгі үздік ассистенттер: Нұралы Сабыржан мен Әбілмансұр Хамит (екеуі де – «Оқжетпес») және Ердәулет Исмаилов («Жеңіс») – 4 нәтижелі пастан.
