Freedom QJ League маусымының соңына дейін бар болғаны екі тур қалса да, бірден төрт команда «Қайраттан» кейінгі екінші орынды иеленуге мүмкіндік сақтап отыр. Әр үміткердің күміс медальге жету жолындағы мүмкіндіктерін талдап көрейік.
«Жас Қыран»
Бір кезеңде Сергей Киров шәкірттері күмәнсіз күміс жүлдеге басты үміткер саналатын. Алайда соңғы бес матчта небәрі жеті ұпай жинап, аздап қарқынын бәсеңдетті. Соған қарамастан, «Жас Қыран» әзірге турнир кестесінде қалаулы екінші орында тұр – және келесі екі қарсыласынан бір ұпайға алда. Дегенмен, алматылықтардың күнтізбесі оңай емес: алда «Иртыш» пен «Астанаға» қарсы ойындар күтіп тұр.
«Астана»
Астаналықтардың еншісінде – 36 ұпай, яғни «Жас Қыраннан» бір ұпайға аз. Егер соңғы турда алматылықтарды жеңсе, «Астана» күміс жүлдені өз қоржынына салады. Бірақ оған дейін «Ордабасыдан» ұпай жоғалтпау қажет.
«Шахтер»
Қарағандылықтардың да 36 ұпайы бар, бірақ қосымша көрсеткіштер бойынша «Астанадан» төмен. Есесіне олардың кестесі сәл жеңілдеу – алда тек «Тобыл» және «Ордабасы» командаларымен кездесулер қалады. Соңғы екі маусымда «Шахтер» жүлделі үштіктің сыртында қалып қойған еді, сондықтан бұл жолы команда бар күшін салып, сол қателікті қайталамауға тырысады.
«Ордабасы»
Шымкенттіктердің күміс медальге деген мүмкіндігі өзгелермен салыстырғанда аздау. Қазір «Ордабасы» «Жас Қыраннан» үш ұпайға артта, әрі жеке кездесулерде де алматылықтар алда. Дегенмен Қанат Мұсатаев шәкірттері – қазіргі Freedom QJ League вице-чемпиондары, сондықтан маусымды кем дегенде үздік үштікте аяқтауға тамаша мүмкіндік бар. Оның үстіне, олар алда дәл сол басты қарсыластары – «Астана» және «Шахтермен» кездеседі.
Freedom QJ League турнирі халықаралық үзіліске шықты. Келесі ойындар 18 қазанда жалғасады.
.webp)
(0).webp){kind=logo}
.webp){kind=logo}
.webp)