Freedom QJ League 2025 маусымының үздік қақпашысы: лонг-листке кімдер енді?

Еске сала кетейік, әр номинация Қазақстан футболының танымал тұлғаларының есімімен аталады. Ал маусымның үздік қақпашысына берілетін марапат Александр Убыкиннің атымен аталады.

Александр Сергеевич Убыкин – кеңестік футболшы, қақпашы, қазақстандық футбол бапкері, КСРО спорт шебері.

Футболды туған қаласы Алматыда бастады. 16 жасында жаттықтырушысы Анатолий Матвеевич Ромкомен бірге Псковқа аттанып, үш жыл бойы «Электрон» және «Машиностроитель» командаларында өнер көрсетті.

1972 жылы әскер қатарына шақырылды. Сол кезеңде Ленинград облысы чемпионатында ойнаған Выборгтың «Звезда» клубында қақпашы болды. Кейін Ростовтың армиялық командасы оны байқап, үш маусым сол клубта ойнады.

1976 жылғы маусымда туған клубына – «Қайратқа» оралды. Сол кезде «Қайрат» қайтадан жоғарғы лигада ойнау құқығын иеленген болатын. 1980 жылға қарай Убыкин алматылық клубтың негізгі қақпашысына айналды. Ол «Қайрат» сапында жоғары лигада 207 және бірінші лигада 50 матч өткізді. 1988 жылы Павлодардың «Трактор» клубында ойнап, бірінші лига жолдамасы үшін күресті.

Футбол бапкері ретінде 35 жылдық тәжірибесі бар. Әр жылдары республикалық футбол мектептері мен клубтарда жұмыс істеді, ұзақ уақыт бойы алматылық «Қайраттың» қақпашылар бапкері болды.

Айта кетейік, 2023 жылы маусымның үздік қақпашысы атағын «Актобе» клубының ойыншысы Саятхан Құсайынов иеленген болатын, ал келесі жылы Александр Убыкин атындағы марапат «Шахтердің» қақпашысы Ян Лаловқа табысталды.

Биылғы жылдың лонг-листіне бес қақпашы енді: Мадияр Төлеубек («Ертіс»), Бахтияр Алдашев («Қайрат»), Махмуджан Сунгатуллин («Жас Қыран»), Санжар Рахматиля («Тараз») және Саян Насихатұлы («Атырау»).

Марапат иегерінің есімі 1 қарашада өтетін QJ League Awards салтанатты рәсімінде жарияланады.