2025 маусымының басталуына орай Freedom QJ League баспасөз мәслихаты өтті

Спикерлер қатарында Freedom Holding Corp. бас атқарушы директоры Тимур Турлов, Freedom QJ League президенті Рохус Шох, Mastercard компаниясының Қазақстан және Орталық Азиядағы бас директоры Санжар Жамалов және Changan Kazakhstan дистрибуциясы директорының орынбасары Сергей Галкин болды.

Бастапқы бейнероликте Лига алғашқы екі жылдың қорытындысын шығарды. Осы уақыт ішінде Freedom QJ League жобасына тікелей тартылған 3000-нан астам спортшы мен маман – бапкерлер, менеджерлер, әкімшілік қызметкерлер қамтылды. 226 жас ойыншы кәсіби футболда өздерін көрсетуге мүмкіндік алды – соның ішінде Қазақстан чемпионатының жоғары дивизионы мен халықаралық матчтарда.

Freedom QJ League және сыртқы ақпарат көздеріндегі жалпы қамтылым 168 миллион қаралымнан асты. Барлық 452 матчтың жоғары сападағы трансляциялары YouTube-те қолжетімді, ал жүздеген ойын республикалық телеарналарда комментаторлар сүйемелдеуімен тікелей эфирде көрсетілді.

Сонымен қатар, Лига бапкерлер мен басқа да мамандарға арналған бірнеше оқыту семинарларын өткізіп, аймақтарда мыңнан астам баланы қамтыған футбол фестивальдарын ұйымдастырды. 2024 жылдың қыркүйегінде жаттығу үдерісін оңтайландыруға арналған FF Manager атты өздерінің цифрлық көпфункционалды платформасын іске қосты. Кейін бұл жоба Tagline Awards атты беделді халықаралық digital сыйлығының 11 номинациясы бойынша марапаттарға ие болды.

Лига өз аясын кеңейтіп жатыр: жаңа маусымда 16 жасқа дейінгі ұлдар арасында жарыстар өтеді. Сонымен қатар, алғаш рет қыздар арасында да турнир ұйымдастырылады – 17 жасқа дейінгі сегіз команда қатысады.

Freedom QJ League қатарына үш жаңа команда қосылады: «ҚФФ U-16», «Хан-Тенгри» және «Жеңіс». 2025 маусымында барлығы 18 өңірден 54 командадан 1620 жас ойыншы бақ сынайды. Жалпы 542 матч өткізу жоспарлануда.

Өткен жылдан бастап Freedom QJ League клубтары құрамында тек Лига командаларымен жұмыс істейтін әкімші, дәрігер, медиа-офицер және маркетолог болуын міндетті етті. Жаңа маусымда тағы екі лауазым қосылады: менталды даярлық бапкері мен үйлестіруші.

Сондай-ақ, спорттық-аналитикалық бөлім екі жаңа жобаны іске қосады: «Болашақ ойыншысы» және «Болашақ бапкері». Бұл жобалардың мақсаты – дарынды ойыншылар мен бапкерлерге маусым бойы жеке қолдау көрсету, олардың әлеуетін толық ашуға көмектесу. САБ үшін «ақылды» камералар орнату және жаттығу үдерісінің видеоаналитикасын енгізу жобасы аясында (Freedom Telecom-мен бірлесіп жүзеге асады) терең статистика жинау мен өңдеу мүмкіндіктері артады.

«Біз шын жүректен сенеміз: футбол – ең танымал, ең бұқаралық спорт түрі. Біздің еліміз бұл ойынды шынымен жақсы көреді. Ойыншылар мен мамандар арасында да таланттар жеткілікті, және дұрыс тәсіл қолданылса, біз әдемі әрі үздік футбол көрсете аламыз. Қазақстандық футболшылардың Еуропада және әлемдегі беделді жарыстарда жеңіске жетпеуіне ешқандай себеп жоқ.

Ол үшін ұзақмерзімді жоспарлау қажет. Бұл ұзақ жол, оны дұрыс және жүйелі өту керек. Біз осы жолдың бір бөлігін өтіп, әрі қарай да жүріп келеміз. Егер осы бағыт жалғаса берсе, алдағы жылдары қазақстандық футбол сапалы дамып, алдымен өз ойыншыларымен мақтана алады», – деді Лига қамқоршылық кеңесінің төрағасы Тимур Турлов.

«Әр маусым – ерекше, бірақ бұл жолы біз алғаш рет қыздарға арналған турнирді іске қосамыз. Бұл – үлкен оқиға, себебі ол қазақстандық қыздар үшін футболдағы жаңа жолды ашады.

Freedom QJ League – дамуға жақсы серпін беретін платформа. Бұл – құр сөз емес, оны бәрі көріп, түсініп отыр. Аймақтарда қыздарға арналған турнирді ұзақ күткен: бұл туралы маған жеке кездесулерде де, әлеуметтік желілерде де айтқан. Бәрі жоспар бойынша жүріп жатыр, Лига біртіндеп дамып келеді», – деді Лига президенті Рохус Шох.

2024 маусымының алдында Freedom QJ League Mastercard компаниясымен серіктестік келісімге қол қойды – бұл әлемдегі ең ірі қаржы қызметтері корпорацияларының бірі.

Лиганың медиа және маркетинг блогының жетекшісі Антон Лысяк серіктестіктің алғашқы жылының қорытындысын ұсынды. Маусым бойы тараптар тек ойын-сауық бағытында ғана емес, әлеуметтік бағытта да бірнеше бірлескен шаралар өткізді – мысалы, Павлодарда қыздарға арналған алғашқы футбол фестивалі. Пресс-конференция барысында бұл ынтымақтастық 2025 жылы да жалғасатыны айтылды.

Mastercard-тың Қазақстан және Орталық Азиядағы бас директоры Санжар Жамалов былтырғы жетістіктерді атап өтіп, алдағы маусымға сеніммен қарайтынын жеткізді:

«Футбол – көптеген қазақстандықтар үшін басты спорт түрі. Mastercard әлем бойынша спорттық оқиғаларды қолдайды, оның ішінде УЕФА Чемпиондар лигасы да бар. Біз бұл жаһандық тәсілді Қазақстанда дамытуға қуаныштымыз және Freedom QJ League серіктесі болу – біз үшін үлкен мәртебе. Жасөспірімдер футболының дамуына үлес қосу – маңызды іс. Жаңа маусымда назарымыз тек ұлдар футболында ғана емес, қыздарда да болады. Барша спортшыларға, спортшы қыздарға және бапкерлерге жарқын жеңістер мен ұмытылмас сәттер тілейміз!», – деді ол.

2024 жылғы 23 тамызда Алматыда дәстүрлі QJ League All Star матчы өтеді – Лиганың үздік ойыншыларынан құралған құрам Мадридтің әлемдегі ең үздік академияларының бірі – «Атлетико» клубының тәрбиеленушілеріне қарсы ойнайды.

Пресс-конференцияда Лиганың жаңа серіктесі таныстырылды – Қытайдың Changan брендінің Қазақстандағы ресми дистрибьюторы, «Астана Моторс» құрамына кіретін компания.

Компания Лиганың барлық негізгі іс-шараларына – ашылу матчы, маусымның жабылу салтанаты, аймақтардағы футбол мерекелері мен қайырымдылық бастамаларға белсенді түрде атсалысады. Әрбір матч-дэй іс-шарасы Changan-ның инновациялық көліктерімен танысу алаңына айналады: бренд аймақтары, тест-драйвтар, кеңестер және арнайы акциялар ұйымдастырылады. Сонымен қатар, компания QJL All Star мен мадридтік «Атлетико» арасындағы матчтың ресми серіктесі ретінде эксклюзивті контент пен ерекше демеушілік мүмкіндіктер ұсынады.

«Футбол – бұл жай ғана жарыс емес, бұл – жастарға өз қабілеттерін көрсетуге, командада жұмыс істеуді үйренуге және жаңа жетістіктерге ұмтылуға мүмкіндік. Freedom QJ League секілді бастамаларды қолдау – бұл еліміздің және балаларымыздың болашағына салынған инвестиция. Біз бұл маусымда көптеген жарқын сәттер мен жаңа жұлдыздарды көреміз деп үміттенеміз. Әрбір қатысушы – салауатты әрі белсенді қоғам қалыптастыру жолындағы маңызды қадам. Келіңіздер, спортты баршаға қолжетімді етіп, жас спортшылардың армандарын бірге қолдайық!», – деді Changan Kazakhstan дистрибуциясы директорының орынбасары Сергей Галкин.

Freedom QJ League-тің жаңа маусымы 19 сәуірде басталады.