Freedom QJ League клуб қызметкерлеріне арналған семинардың екінші күнінің қорытындылары

Спорттық трек аясында күнді Лиганың аналитикалық сүйемелдеу жөніндегі маманы Тимур Құсайыновтың баяндамасы ашты. Ол қатысушыларға FF Manager цифрлық платформасымен қалай жұмыс істеу керектігін түсіндірді.

Одан кейін сөз алған сарапшы-талдаушы әрі Қазақстанның 17 жасқа дейінгі жасөспірімдер құрамасының бас бапкері Бауыржан Сағындық өз лекциясында ойыншылардың амплуасына байланысты жеке әрекеттерін талдауға, олардың күшті және әлсіз тұстарын анықтауға, сондай-ақ қарсылас футболшыларымен салыстыруға тоқталды.

Түскі үзілістен кейін жарыстарды ұйымдастыру және өткізу бөлімінің жетекшісі Қуандық Ермекбаев сайтпен және хаттамалармен жұмыс істеудің ерекшеліктерін түсіндірді, ал медиа және маркетинг бөлімінің жетекшісі Антон Лысяк футбол орталықтарының қызметкерлеріне маркетингтік қолдаудың маңыздылығы туралы семинар өткізді.

«Барлығы өте жақсы өтті, семинарда қойылған барлық мақсаттар орындалды. Футбол орталықтарының басшылары мен үйлестірушілерімен керемет байланыс орнады. Біз маусымға арналған жоспарлармен бөлісіп, жаңа жобаларды таныстырдық. Сондай-ақ интерактивті лекциялар да болды», – деп қорытындылады оқу процесін Лиганың спорттық-аналитикалық блогының жетекшісі Арсен Іңкәрбеков.

Медиа мен маркетингке арналған трекке келер болсақ, екінші күннің бағдарламасын Лиганың медиа-маркетинг жөніндегі үйлестірушісі Адлет Талғатбектің дәрісі ашты. Ол клубтар арасында осы салада өтетін алдағы чемпионаттың форматы туралы айтып берді. Одан кейін баспасөз хатшысы Бекежан Ардақұлы мен контент-менеджер Әсем Ахмет Лиганың медиа мен SMM бойынша талаптарымен қатысушыларды таныстырды.

Түскі үзілістен кейін Арсен Іңкәрбеков клубтардың медиа-офицерлері мен маркетологтарына жаттықтырушылар және спорттық-аналитикалық бөліммен өзара әрекеттесу тақырыбында семинар өткізді, ал Қуандық Ермекбаев сайтпен және хаттамалармен қалай жұмыс істеу керектігі туралы баяндады.

Содан кейін семинар қатысушылары алдында спорт журналисі Әлімжан Тасболатұлы сөз сөйлеп, БАҚ-пен жұмыс істеудің ерекшеліктеріне арналған дәріс оқыды. Сонымен қатар, Қазақстан теннис федерациясының PR және маркетинг бөлімінің жетекшісі Гүлмира Закирьянова ірі халықаралық жарыстарды ұйымдастыру тәжірибесімен бөлісті – айта кетейік, Қазақстанда жыл сайын ATP туры аясында беделді теннис турнирлері өтеді.

Екінші күннің соңында клуб қызметкерлеріне арналған тимбилдинг ұйымдастырылды. Онда «Мен кіммін?» және Alias ойындарын ойнағандарға таныс механика қолданылды, алайда ерекше тақырыптар Freedom QJ League-ны, сондай-ақ жалпы қазақстандық және әлемдік футболды қамтыды.

Лиганың үшінші маусымы 19 сәуірде басталады.