Freedom QJ League U-17, U-16, U-15: 12-турдағы голдар жауыны

Freedom QJ League U-17

«Шахтер» басымдығынан айырылды

Чемпиондық бәсекеде маңызды өзгерістер болды.

Павлодарда «Қайрат» «Ертісті» 5:0 есебімен ойсырата жеңді. Барлық гол үзілістен кейін соғылды – Радмир Вдовин, Темірлан Әбжапар, Тамерлан Сарсымбаев, Ибрахим Асан және Дінмұхамед Жақсыбеков бір-бір реттен мергендік танытты. Әбжапар голдан бөлек бірден үш нәтижелі пас бергенін атап өткен жөн.

Ал «Шахтер» Таразда ұпай жоғалтты – 1:1. Алаң иелері 66-минуттан бастап алда болды, голды Нұрдәулет Әлемұлы соқты, бірақ 76-минуттан бастап оларға он ойыншымен ойнауға тура келді. «Кеншілер» жеңілістен қосылған уақытта құтылды: Елдар Жолдықанов есепті теңестірді.

Енді «Қайрат» пен «Шахтердің» еншісінде 32 ұпайдан бар. Доп айырмасы жақсы болғандықтан, бірінші орында «сары-қаралар» тұр. Екі команда да әлі жеңілген жоқ: 10 жеңіс және екі тең ойын.

Ақтөбедегі триллер

«Ақтөбе» өз алаңында «Ордабасыны» тартысты кездесуде 3:2 есебімен жеңді.

Есепті оңтүстік командасының үздік сұрмергені Алмат Сапархан ашты (19'), бірақ кейін алаң иелері ойын барысын өзгертті – Нұралы Бижанов пен Арсен Байжанов алты минут аралығында гол соқты.

Екінші таймда Нихад Ашрафов есепті теңестірді, бірақ 89-минутта алаңға қосалқы құрамнан шыққан «қызыл-ақтардың» жартылай қорғаушысы Нұрым Ертлеуов жеңіс голын соқты.

«Ақтөбе» қатарынан жеті тур бойы жеңілген жоқ. Команда төртінші орынға көтеріліп, «Ордабасыдан» үш ұпайға ғана қалып келеді.

Алматыдағы сенсация

«Қызыл-ақтар» төртінші орынды «Жас Қыраннан» тартып алды. Оңтүстік астананың командасы өз алаңында ҚФФ академиясынан 1:4 есебімен ірі жеңіліс тапты.

Қонақтар сапында Ерасыл Ибатулла, Жәңгір Серік, Артур Абдущеев және Абзал Әділхан гол соқты. Алаң иелерінің жалғыз голын Бағашар Ерсінұлы енгізді.

Осылайша ҚФФ академиясы төрт матчқа созылған жеңіссіз сериясын тоқтатты. Ал «Жас Қыран» соңғы бес турдың төртеуінде жеңілді.

Freedom QJ League U-16

«Қайрат» алға ұзап барады

«Сары-қаралар» осы жас санатында да «Ертісті» ірі есеппен жеңді – 4:0. Үш гол бірінші таймда соғылды: Азамат Құттыморат (15'), Қайсар Ануарбек (19') және Дастан Рүстем (40', пенальтиден) мергендік танытты.

73-минутта алаңға қосалқы құрамнан шыққан Шыңғыс Асаналиев төртінші голды соқты.

12 турдан кейін «Қайрат» U-16 командасында 11 жеңіс пен бір тең ойын бар. Алматылықтар 53 гол соғып, небәрі үш доп жіберді және «Шахтерден» жеті ұпай алда келеді. Ал «Ертістің» төрт матчқа созылған жеңіліссіз сериясы аяқталды.

«Шахтер» тағы да ұпай жоғалтты

«Қайрат» ең жақын қарсыласының кезекті сәтсіздігінің арқасында көш басындағы жағдайын нығайтты. Қарағандылықтар өз алаңында «Тараздан» ұтыла жаздады. Қонақтар бірінші таймның соңында алға шықты, голды Айбын Қақитайұлы соқты. Тек екінші таймның қосылған уақытында «кеншілердің» капитаны Әділет Бораналы есепті теңестірді.

«Шахтер» қатарынан үш матчта жеңіске жете алмады. Ал турнир кестесінің соңғы алдындағы орнында тұрған «Тараз» үшін бұл маңызды ұпай болды. Команданың 12 турдан кейін 7 ұпайы және 8 голы бар.

Қызылордадағы Алибаевтың хет-тригі

«Тобыл» сырт алаңда «Қайсарды» 5:2 есебімен жеңді. Кездесудің тағдыры бірінші таймда-ақ шешіле жаздады: Дияр Балғынбаев алғашқы минутта гол соқты, Назар Каленский 19-минутта басымдықты арттырды, ал Дамир Алибаев үзіліске дейін екі рет мергендік танытты.

Екінші таймда «Қайсар» Мейіржан Сұлтанұлы мен Нұрислам Исатайевтің пенальтиден соққан голдарымен жауап берді. Алайда 71-минутта Алибаев хет-трик жасап, таблодағы соңғы есепті орнатты. 57-минуттан бастап «қасқырлар» он ойыншымен ойнағанын айта кетейік – Азим Салединов дөрекі ойыны үшін екінші сары қағаз алды.

«Қайсар» 12 турдың онында жеңіліп, турнир кестесінің соңғы орнында тұр. «Тобыл» – алтыншы орында.

«Каспий» маусымда алғаш рет гол жібермеді

Ақтаулықтар «Астананы» 2:0 есебімен жеңді. Голдарды Мағжан Мұхат (32') пен команда капитаны Рахманберди Александр (80') соқты. Бұл 12 турда 41 гол жіберген команданың маусымдағы алғашқы «құрғақ» матчы болды. Ал «Астана» қатарынан екінші рет жеңілді.

U-16 турниріндегі маңызды ерекшеліктің бірі – кестенің орта бөлігіндегі тығыздық. Төртінші орында тұрған «Атлетико» (19 ұпай) сегізінші орындағы «Ертістен» (17) небәрі екі ұпай алда. Олардың арасында «Астана», «Тобыл» және «Ақтөбе» орналасқан – үшеуінде де 18 ұпайдан бар.

Freedom QJ League U-15

«Қайраттың» сегіз голы және Тұрсынның хет-тригі

Ең кіші жас санатында көшбасшы «Ертісті» 8:0 есебімен ойсырата жеңді.

Алматылықтар үзіліске 3:0 есебімен шықты – Диас Әбубәкір, Абдурахим Оңғарбек және Илфрат Елақаев гол соқты. Екінші таймда команда капитаны Абылай Тұрсын жарқын ойын көрсетіп, 15 минуттың ішінде хет-трик жасады (64', 76' және 79'). Дани Әубәкіров пен Мадияр Надир де бір-бір голдан соқты. Надир 71-минутта пенальтиді орындай алмады, бірақ қосылған уақытта мергендік танытты.

«Қайраттың» еншісінде 11 жеңіс пен бір тең ойын бар. Команда 82 гол соғып, сегіз доп жіберді. «Ертіс» үшін бұл маусымдағы ең ірі жеңіліс болды, дегенмен павлодарлықтар үшінші орнын сақтап қалды.

«Тобылдың» кезекті жеңісі

Қостанайлықтар сырт алаңда «Қайсардың» қақпасына жауапсыз жеті гол соқты.

Турдағы тағы бір хет-трикті Әлижан Әміртаев жасады (8', 52', 56'). Сонымен қатар Төлеген Нұрмаш, Исмеджан Бермұхамбет, Руслан Плясковский және Ілдар Жармағамбетов бір-бір реттен гол соқты. Плясковский де Алматыдағы Надир секілді пенальтиден «Қайсар» қақпашысын жеңе алмады (48'), бірақ он минуттан кейін Карим Қылышжановтың қақпасына ойыннан гол соқты.

Қостанайлықтар 27 ұпаймен екінші орында сенімді келеді және бес матчта гол жіберген жоқ. Ал «Қайсар» 12 турда 62 гол өткізіп, соңғы орында тұр.

12-турдан кейінгі үздік сұрмергендер
Freedom QJ League U-17: Тимур Тұғамбеков («Жас Қыран», 10 гол);
Freedom QJ League U-16: Балахмет Әділбек («Тобыл», 13 гол);
Freedom QJ League U-15: Абылай Тұрсын («Қайрат», 21 гол).

12-турдан кейінгі үздік ассистенттер
Freedom QJ League U-17: Темірлан Әбжапар («Қайрат», 9 нәтижелі пас);
Freedom QJ League U-16: Дамир Алибаев («Тобыл», 8 нәтижелі пас);
Freedom QJ League U-15: Абылай Тұрсын («Қайрат», 9 нәтижелі пас).