Диас Омаров атындағы сыйлықты ұсынамыз!

Диас Омаров – кеңестік және қазақстандық футболшы, спорт журналисі, комментатор.

Футболды Диас Ілиясұлы бала кезінен сүйді. Ол белгілі бапкер Георгий Козельконың тәрбиесінде болды. 1959 жылы «Қайрат» клубының қатарына қабылданды. «Қайраттың» жоғарғы лигада өткізген алғашқы төрт маусымында Диас Омаров дублерлер құрамының үздік сұрмергені атанып отырды. Ал негізгі құрам сапында алты маусым ішінде КСРО чемпионатында 23 матч өткізіп, үш гол соқты.

Карьерасын аяқтаған соң спорт журналисі болды. Барлығы команда қабырға газетіне жазудан басталды. Кейіннен одан КСРО чемпионатының кезекті матчы туралы «Советский спорт» басылымына есеп жазуды өтінді. Осылайша Диас Ілиясұлы өз өмірін журналистикамен байланыстырды. Көп жылдар бойы Қазақ радиосы мен теледидарында спорт шолушысы, комментатор болып еңбек етті.