QJ League Awards 2025: «Үздік шабуылшы», шорт-лист

Жеке марапатқа финалдық үш үміткер анықталды: Абылай Төлеухан («Қайрат»), Ален Пак («Астана») және Глеб Макридов («Шахтер»).

Абылай Төлеухан Лигадағы 14 матчта 16 гол соғып, тоғыз нәтижелі пас берді. Оның ең сәтті ойындары «Ордабасыға» қарсы (7-тур, хет-трик), «Атырауға» қарсы (3-тур, 2+1 — 34 минутта), «Актобемен» (10-тур, үш ассист) және «Шахтермен» (15-тур, 2+1) өткен кездесулер болды. Өткен жылы Абылай «Қайрат» сапында бірден екі турнирде – U18 және U17 – чемпион атанған еді.

Ален Пак маусым барысында 18 матч өткізіп, 16 гол және үш нәтижелі паспен көзге түсті. Оның екі хет-тригі бар: «Ертіспен» (17-тур) және «Тобылмен» (20-тур) ойындарында. Маусым қорытындысы бойынша «Астана» күміс жүлдеге ие болды.

Глеб Макридов Freedom QJ League үшінші маусымында 19 матчта 19 гол соғып, 10 нәтижелі пас берді. Оның ең әсерлі ойыны «Қайсарға» қарсы өтті – 9-турда Глеб 2+2 нәтижесін көрсетті, ал 20-турдағы қарымта кездесуде хет-трик пен бір ассист жасады. Сонымен қатар, Макридов Лиганың флагмандық турнирі тарихында ең көп минут ойнаған (4 502) және ең көп нәтижелі әрекет жасаған (39) футболшы атанды. Осы көрсеткіш бойынша ол «Қайрат» ойыншысы Дастан Сатпаевты басып озды.

Жеңімпаздың есімі 1 қараша күні өтетін QJ League Awards салтанатты рәсімінде жарияланады.

Еске сала кетсек, 2023 жылы маусымның үздік шабуылшысы атанған жүлдені «Қайрат» ойыншысы Рамазан Багдат иеленсе, келесі маусымда марапат «Тараз» шабуылшысы Нұрдәулет Орынбасарға бұйырған еді.