QJ League Awards 2025: «Үздік жартылай қорғаушы», шорт-лист

Маусымның үздік жартылай қорғаушысы атағына финалдық үміткерлер: Алиден Мусаипов («Қайрат»), Руслан Рахметов («Ертіс») және Даниял Назаров («Астана»).

Алиден Мусаипов 18 матчқа қатысып, төрт гол соғып, бір нәтижелі пас берді. Сондай-ақ оның еншісінде – 880 пастың 717-сі дәл (81%) және 238 дуэльдің 142-сінде (60%) жеңіске жеткен. Бұл Алиденнің QJ League-дағы екінші маусымы – өткен жылы ол алматылық командамен бірге екі турнирде қатар (U18 және U17) чемпион атанған.

Руслан Рахметовтің еншісінде 18 ойында 11 гол мен үш ассист бар. Оның ішінде «Ақтөбеге» қарсы бірінші тур матчындағы хет-трик пен екі нәтижелі пас та бар. Сонымен қатар оның статистикасына 74 доп тартып алу, 25 пас үзу, 346 пасстың 230-ы дәл (66%) және 405 дуэльдің 173-інде (43%) жеңіс кіреді.

Даниял Назаров маусымдағы 22 матчтың барлығына қатысты. Ол 1094 пасстың 842-сін дәл жеткізді (77%), 229 дуэльдің 121-інде жеңіске жетіп, 216 допты тартып алу мен іліп әкету және 106 пас үзу жасады.

Марапат иегерінің есімі 1 қарашада өтетін QJ League Awards салтанатында жарияланады.

Еске салайық, 2023 жылы бұл марапатты «Қайрат» ойыншысы Олжас Байбек, ал келесі маусымда «Шахтер» клубының өкілі Роман Асылбаев иеленген болатын.