Сейілда Байшақов атындағы жүлде!

Сейілда Икрамұлы – КСРО спорт шебері, халықаралық дәрежедегі спорт шебері, Қазақстан Республикасының еңбек сіңірген жаттықтырушысы. Ол көптеген жылдар бойы футболшы ретінде алматылық «Қайрат» командасының капитаны болып, КСРО ұлттық құрамасында ойнаған.

1969 жылы Сейілда Байшақов Қазақ КСР құрамасына шақырту алды. Сол кездегі бас бапкер Борис Каретников елдің әр аймағындағы үздік ойыншыларды біріктіріп, мықты команда құрды.

«Қайраттағы» алғашқы ойынын Сейілда Икрамұлы 1971 жылдың 27 наурызында Ворошиловградта жергілікті «Заряға» қарсы өткізді. 20 жастағы қорғаушыға бапкерлер сенім артып, оны бастапқы құрамға қосты. Байшақов сенімді ақтап, сол жылы КСРО жоғарғы лигасының үздік дебютанты атанды. «Қайратпен» бірге Халықаралық теміржолшылар одағының кубогын жеңіп алып, 1972 жылдың 22 наурызында «КСРО спорт шебері» атағына ие болды.

Сейілда Байшақов КСРО жоғарғы лигасында 7, ал бірінші лигада 4 гол соққан. «Қайрат» сапында 11 жыл өнер көрсеткен кезеңінде ол 6 маусым бойы команда капитаны болды. Барлығы 249 матчты жоғарғы лигада және 71 ойынды бірінші дивизионда өткізген.