Қыздар турнирінің өткен матчтарындағы басты оқиғалармен бөлісеміз.
«Қайрат» Қостанайда алты гол соқты
Матчтың бірінші таймының басым бөлігінде «Тобыл Аренадағы» алаң иелері көшбасшыдан небәрі бір доп айырмасымен қалып отырды.
Оның үстіне, «Тобылдың» есепті теңестіруге мүмкіндігі болды: 34-минутта қостанайлық команда 11 метрлік соққы орындау құқығына ие болды, алайда Анара Қабдықағарованың соққысы қақпадан қиыс кетті.
Үзіліске аз уақыт қалғанда «Қайрат» басымдығын арттырды – Милена Николенко өзінің екінші голын соқты. Екінші таймда қонақтар тағы төрт рет мергендік танытты: София Ягудина дубль жасады (матчта «гол+пас» жүйесі бойынша 2+2), Николенко хет-трикке қол жеткізді, ал тағы бір голды Жания Махаш соқты – оның еншісінде екі нәтижелі пас та бар.
Оксана Коханнаяның командасы үшін бұл 11 матчтағы оныншы жеңіс: 66 гол соғып, жетеуін жіберген. «Тобылдың» жағдайы қиындай түсті, бірақ қола жүлдеге таласу мүмкіндігі әлі де бар – әсіресе бәсекелестеріне көшбасшылармен ойнау қалғанын ескерсек.
«Астана» қалыспай келеді, бірақ уақыт азайып барады
Елорда командасы өз міндетін мүлтіксіз орындады – өз алаңында «Қайсарды» 3:0 есебімен жеңді. 39-минутта есепті Адия Маматраимова ашса, екінші таймда Асыл Пазыл мен Айнель Сманова гол соқты.
«Қайсар» қатарынан тоғызыншы рет жеңіліп, әлі де үш ұпаймен келеді. Соңғы орыннан көтерілу үшін қызылордалық футболшыларға «Тобыл», «Ертіс» және… «Қайратқа» қарсы қалған матчтарда кемінде бес ұпай жинау қажет.
«Қайратқа» (30 ұпай) өз алаңында «Ертіс» пен «Шахтерді» қабылдап, сондай-ақ «Қайсарға» қонаққа бару қалды. «Астананы» (28) Шымкент пен Қарағандыға сапар және өз алаңында «Ақтөбеге» қарсы кездесу күтіп тұр.
«Ақтөбе» мен «Шахтер» өз матчтарында жеңіске жетті
«Ақтөбе» өз алаңында «Ордабасыны» 2:0 есебімен жеңді.
Екі гол да үзілістен кейін соғылды: 52-минутта «қызыл-ақтардың» капитаны Маулуда Армат пенальтиді сәтті орындаса, 63-минутта қорғаушы Назым Кулетова есепті қорытындылады. Шымкент командасы қатарынан екінші рет жеңіліп отыр.
Ал «Шахтер» Павлодардан үш ұпай алып қайтты – 1:0. Жалғыз голды қарағандылықтардың капитаны Амина Аужанова 7-минутта соқты. «Ертіс» қатарынан үшінші матчында жеңіліп, жеті ұпаймен жетінші орында қалды.
Енді «Ақтөбе» мен «Шахтер» 17 ұпайдан жинап, үшінші орынды бөлісіп тұр. Келесі турда олар бір-бірімен «золушкалардың» алаңында кездеседі. «Тобыл» бұл командалардан үш ұпай қалып келеді және Қызылордадағы жеңіс арқылы жүлде жолындағы таласқа қайта қосылуға тырысады.
11-турдан кейінгі үздік сұрмерген: Милена Николенко («Қайрат», 20 гол).
11-турдан кейінгі үздік ассистент: Жания Махаш («Қайрат», 13 нәтижелі пас).
.webp)