Бүгін QJL All Star матчында Қазақстанның үздік жас футболшыларымен кездесетін Мёнхенгладбахтың «Боруссия» академиясы командасының құрамын таныстырамыз.
Қақпашылар: Максимилиан Кванте, Янник Бринкманн.
Қорғаушылар: Джоэл Увахонье, Нильс Петерс, Нильс Хагедорн, Люк Тенканен, Рафаэль Карас, Шарли Ваншаз, Максим Лагос, Озан Сулаксу.
Жартылай қорғаушылар: Пит Заутнер, Салих Юша Джаным, Иван Чалета, Пауль Ингенфельд, Феликс Шлёссер, Филип Чирович, Лукас Андре, Пауль Лука Ценц.
Шабуылшылар: Кенни Вестйенс, Максимилиан Доннер, Йоханн Нгонганг, Алдрин Асани.
Бас бапкер: Денис Хаусвальд. Бас бапкердің ассистенттері: Кристиан Циге және Нильс Вюстен.
Жастығына қарамастан, бұл ойыншылардың көбі футбол ортасында жақсы беделге ие болып үлгерді. «Боруссияның» кейбір футболшыларына жақынырақ назар аударуды ұсынамыз.
№9 Максимилиан Доннер: Буффон бақылаған шабуылшы
Доннер Германияда туып-өскен, «Боруссия» академиясынан өткен және тіпті Германия жасөспірімдер құрамасының оқу-жаттығу жиындарына шақырту алған. Алайда ол түп-тамыры жатқан Италияны таңдады.
Және қателеспеді: Италия футбол федерациясының турнирінде үздік сұрмерген атанды, ал оның ойынын трибунадан Джанлуиджи Буффонның өзі бақылаған. Италиялық баспасөз Доннерді қазірдің өзінде «Скуадра Адзурраның» «болашақ шабуылшысы» деп атайды, ал Италияның жасөспірімдер құрамалары сапында ол Түркия мен Словения қақпасына гол соққан. Гладбахта ол тоғызыншы нөмірмен ойнайды – бұл аванс емес, қалыптасқан мәртебенің көрінісі.
№7 Кенни Вестйенс: «Барса» мен «Бавария» таланттарын басып озған нидерландтық
2023 жылы Гладбах «Венло» академиясынан бірден алған төрт жас ойыншының бірі. 2025 жылдың күзінде Вестйенс шағын сенсация жасады: «Барселона», «Бавария», «Зальцбург» және «Штутгарт» академиялары қатысқан беделді Porsche Cup турнирінде жарыстың үздік ойыншысы атанды. Бұл ретте «Боруссияның» өзі жүлдесіз қалды.
Оны отанында да байқап үлгерді: Кенни Нидерланд жасөспірімдер құрамасының қаралым жиындарына шақырылды. Ал клуб ішінде мінезі мен іске деген көзқарасы үшін табысталатын Champions Trophy жүлдесіне ие болды.
№8 Салих Юша Джаным: «гол соғатын машина»
«Құлындардың» ең жаңа трансфері: осы жазда 15 жастағы түрік футболшысы Гладбахқа Дуйсбург академиясынан ауысты. Өткен маусымда ол U-16 командасы сапында 19 гол соққан. Түркия жасөспірімдер құрамасы үшін 13 матч өткізіп, 3 гол соғып үлгерді.
Джаным жақында «Боруссияның» негізгі құрамына еніп, батыл ойынымен стадионды тәнті еткен клуб түлегі Ваэль Мохьяның жолын лайықты жалғастыруы мүмкін. Қазақстандағы матч Джанымның жаңа жейдедегі алғашқы ойындарының бірі болуы ықтимал.
№10 Иван Чалета: Дортмундтан әкелінген ондық
Оныншы нөмір – әрқашан ерекше жауапкершілік. Клуб бұл нөмірді неміс инсайдерлерінің мәліметінше, 2024 жылдың жазында дортмундтық «Боруссия» академиясынан тікелей алып кеткен ойыншыға сеніп тапсырды.
Чалета аймақтағы 2010 жылы туған ең техничалы ойыншылардың бірі саналады: оның әрекеттерін Германиядан Хорватияға дейінгі скауттық парақшалар талдайды, ал финттерінен құралған видеолар футбол әлеуметтік желілерінде қаралым жинайды.
№5 Люк Тенканен: Люксембург паспорты, неміс клубы
Құрамдағы ең ерекше өмірбаян. Тенканен Люксембургте дүниеге келген, ал оның тегі фин тілінен шыққан. Ол жергілікті «Гревенмахер» мектебінен өтіп, Люксембург құрамаларында ойнап үлгерген – алдымен U-15, енді U-16 сапында.
Арқасына бесінші нөмірді алған орталық қорғаушы – халқы Алматы тұрғындарынан да аз елден шыққан ойыншының Бундеслига клубының академиясына дейін жетуінің сирек мысалы.
Осылайша, Қазақстанға Еуропаның ең мықты футбол мектептеріне қарсы халықаралық турнирлерде өзін тұрақты түрде сынап жүрген команда келді деп сеніммен айтуға болады.
QJL All Star 2026: тікелей трансляция
QJL All Star ғана емес: Лига мен «Боруссия» ұзақмерзімді серіктестіктің келешегін талқылады
QJL All Star 2026 құрамы: «Боруссияға» қарсы кімдер ойнайды
«Боруссия» Менхенгладбах академиясы: жақынырақ танысайық
