Қағазсыз және поштасыз: Лига төрешілер үшін орындалған жұмыстар актілерін электронды форматқа көшірді

Осы бағыттағы кезекті маңызды қадам – төрешілер тапсыратын орындалған жұмыстар актілерін электронды форматқа көшіру болды.

Актілер жүйеде автоматты түрде қалыптастырылады. Төреші жеке кабинетіне кіріп, есептік кезеңді таңдайды да, құжатқа eGov Mobile арқылы қол қояды. Содан кейін оған актінің жұмысқа қабылданғаны немесе есептік кезеңнің қате таңдалғаны туралы хабарлама келеді.

Есептік кезең дұрыс таңдалса, төрешіге тек төлемнің түсуін күту қалады.

«Бұрын бәрі әлдеқайда күрделі болатын. Төрешілер поштаға барып, құжаттардың түпнұсқаларын тапсырысты хатпен жіберетін. Актілер кейде қолмен толтырылатын: үлгіні басып шығарып, мәліметтерді қолмен енгізетін.

Егер құжаттан қате табылса, оны кері қайтаратын. Адам бәрін қайта толтырып, қайтадан жіберуге мәжбүр болатын. Ал қазір бәрі әлдеқайда оңай, бұл – ресурстарды айтарлықтай үнемдеу», – дейді жарыстарды ұйымдастыру және өткізу блогының жетекшісі Қуандық Ермекбаев.