Биылғы флагмандық турнирдің жарқын кейіпкерлерінің бірі – «Тобылдың» қақпашысы Даниил Нұржанов. Оны өз позициясындағы көптеген ойыншылардан ерекшелендіретін қызық жайт бар: ол қақпашы қолғабын алғаш рет тек өткен жылы, шабуыл шебінде он жыл ойнағаннан кейін киді.
Бастапқы кезең сәтсіздеу өткеніне қарамастан, Нұржанов жаңа рөлге тез бейімделіп, біртіндеп команданың негізгі құрамынан орын алды. Өткен Freedom QJ League U-17 маусымында Даниил 15 матч өткізіп, оның үшеуінде қақпасына гол жібермеді. Сондай-ақ қарсыластардың 112 соққысының 73-ін қайтарды.
Биыл Даниил құрдастарымен бірге флагмандық турнирге ауысты және маусымның алғашқы бөлігінде өзін жарқын қырынан көрсете алды. Үш турда ол 15 сейв жасап, небәрі екі гол өткізіп алды. Әсіресе «Ордабасымен» өткен матчта жоғары деңгейдегі ойын көрсетті – «құрғақ» матч пен 7 сейв оған Changan Team of The Week құрамына енуге мүмкіндік берді.
Нұржанов Лига баспасөз қызметіне қақпашы ретінде қалыптасуы, үлгі тұтатын ойыншылары және осы маусымдағы мақсаттары туралы кеңінен айтып берді.
– Мен футболға 5 жасымда қызықтым, ал келесі жылы-ақ «Тобылға» келдім. Алғашында шабуылшы ретінде ойнап, осы позицияда шамамен 9-10 жыл өткіздім.
Бірақ өткен жылы, Freedom QJ League-тегі дебюттік маусым алдында, алаңдағы ойыным жүрмей бастады. Бір күні өзімді қақпада сынап көру керек деп ойладым. Жаттықтырушыға жаздым, ол: «Жақсы, келесі жаттығуда қараймыз», – деді.
Сол кезде біздің қақпашылар жарақат алып қалған еді. Бір екіжақты ойында жақсы өнер көрсеттім. Жаттығудан кейін қақпашылар бапкері маған осы позицияда дайындалып көруді ұсынды, мен бірден келістім. Командадағы жігіттер де қолдап, дұрыс таңдау жасағанымды айтты. Ата-анаммен және жаттықтырушылармен сөйлестім – олар да мені қолдады.
– Менің толыққанды дебютім «Ақтөбеге» қарсы матчта өтті. Әрине, ол ойында аса жақсы өнер көрсете алмадым, өйткені тәжірибем аз еді – төрт гол жіберіп алдым. Бірақ бапкерлер мені жігерлендіріп, бұл тек алғашқы матч екенін айтты.
Содан кейін екі ай қосалқы құрамда отырдым. Кейін бапкерлер маған тағы мүмкіндік берді – «Қайсарға» қарсы ойында. Ол матчта гол жібермедім, содан кейін негізгі құрамда жиі шыға бастадым.
– Қақпашы болған кезде мен үшін ең қиын нәрсе – қақпада дұрыс позиция таңдауды түсіну еді. Сонымен қатар Лигада соншалықты көп матч өткізетініме таңғалдым.
– Қазір алаңда ойнауды сағынбаймын. Бірақ алғаш қақпаға тұрған кезімде сағындым. Кейде «позициямды ауыстырмағаным дұрыс па еді?» деген күмәндер болды. Кейін тұрақты ойын тәжірибесін ала бастағанда, сол шешімге барғаным дұрыс болғанын түсіндім.
– Шетелдік ойыншылар арасындағы үлгі тұтатын қақпашым – Давид Райя. Қазақстандықтардан – Игорь Шацкий, Александр Заруцкий және Данил Устименко. Олардың ойыны ұнайды, соларға ұқсағым келеді.
– Маусымдағы жеке мақсаттарым – мүмкіндігінше көп «құрғақ» матч өткізу және жиі Changan Team of The Week құрамына ену. Сонымен қатар QJL All Star матчында ойнап, Қазақстанның жасөспірімдер құрамасына шақырту алғым келеді.
– Ең қиын қарсылас? Ондай қарсыласым жоқ.
– Freedom QJ League өмірімді өзгертті, себебі кәсіби футболға жақындауға көбірек мүмкіндік берді. Лига туралы әсерім тек жағымды: тұру жағдайы, ойнайтын алаңдар, бейнетүсірілім және басқа да көптеген дүниелер – бәрі әлдеқайда жақсарды.
– Амплуасын ауыстырғысы келетін басқа балаларға айтарым: егер осындай ой болса, алдымен жаттықтырушымен ақылдасыңыздар. Ал шешім қабылдасаңыздар – өздеріңізбен жұмыс істеп, ешқашан берілмеңіздер.
––
Нұржанов – үшінші турдан кейінгі Fantasy QJ League-тегі ең тиімді үш қақпашының бірі. Оның еншісінде 15 ұпай бар – дәл осындай көрсеткіш «Қайраттың» қақпашысы Камиль Ғайнуллин мен «Тараздың» ойыншысы Диас Үндашта да бар. Сонымен қатар Даниилді құрамға небәрі 4.5 Freedom-Coins-қа қосуға болады – егер ол осы қарқынын сақтаса, өте тиімді таңдау болмақ.
Өткен маусымдағыдай, Fantasy QJ League-тің әр ойын аптасындағы үздік құрам иелері Лиганың серіктесі – COPA.KZ ұсынған 20 000 теңгелік сертификатпен марапатталады. Маусым жеңімпазы iPhone 17 иеленсе, екінші және үшінші орын алған қатысушыларға PlayStation 5 пен Apple Watch табысталады.
Fantasy QJ League-тің Telegram-дағы өз чаты бар – онда жаңадан қосылған ойыншыларға көмектесуге дайын 250-ден астам қатысушы жиналған. Қосылыңыздар және ұзақ әрі тартысқа толы маусымның бір бөлігіне айналыңыздар!
.webp)
.webp)