Жеңіс пен жүлделі орындар: Лига жобалары MVP Awards сыйлығында жоғары бағаланды

Лига QJL All Star 2025 қарсаңында дизайнерлер арасында өткізілген ашық конкурс үшін «Спорттық ұйымның немесе іс-шараның үздік мерчі, атрибутика жиынтығы» номинациясында жеңіске жетті.

Естеріңізге сала кетейік, байқау жеңімпазы – Қостанай облысынан келген Жүрсін Әуезханның жұмысы мадридтік «Атлетикоға» қарсы матчқа арналған лимиттелген мерч топтамасының дизайнына негіз болған еді. Кейіннен өзін көрсете білген дарынды маман қарағандылық «Шахтердің» графикалық дизайнері атанды.

Сонымен қатар, Лига жобалары «Жас аудиториямен жұмыс істеудегі үздік жоба», «Инновациялық технологияларды үздік қолдану» және «Бюджеті 1 млн рубльге дейінгі үздік әлеуметтік жоба» номинациялары бойынша екінші орынға ілікті. Соңғы марапат QOFA-мен бірлесіп, өткен желтоқсан айында өткен ALGA! x Phygital Kids Fest қайырымдылық фестивалі үшін берілді.

«QJ League-ның мұндай беделді сыйлықта иеленген марапаттарының артында ұйымның дамуына орасан зор үлес қосып жүрген Лига қызметкерлерінің күнделікті қажырлы еңбегі тұр.

Лиганың өте әртүрлі салаларда: жас аудиториямен жұмыс, әлеуметтік жоба, мерч және оған орайластырылған дизайнерлер байқауы, сондай-ақ инновациялық технологияларды қолдану бойынша атап өтілуі қуантарлық жайт. Бұл бір реттік табысты емес, бірден бірнеше бағыттағы жүйелі жұмысты айқындайды.

Оның үстіне бәсекелестер де өте мықты болды: мәскеулік «Спартак» және санкт-петербургтік «Зенит» футбол клубтары, минскілік «Динамо», челябинскілік «Трактор» және омбылық «Авангард» хоккей клубтары, сондай-ақ көптеген лигалар мен федерациялар, букмекерлік компаниялар, спорттық телеарналар, сайттар және т.б. Олардың аясында QJ League өз жобаларымен Қазақстанның намысын өте жоғары деңгейде қорғап шықты», – деп атап өтті Freedom QJ League атқарушы директорының орынбасары Юрий Воропаев.

MVP Awards сыйлығы 2017 жылы MARSPO халықаралық спорттық маркетинг конференциясы аясында негізі қаланып, өткен жылы жаңа атауға ие болды. Биыл сыйлыққа қатысу үшін 300-ден астам өтінім беріліп, шорт-листке 37 номинация бойынша 227 жоба енді.