Fantasy QJ League: жеңімпаздарды қарсы алыңыздар!

Fantasy QJ League маусымының чемпионы атанған – Plescavica_Team. Ол 22 турдың қорытындысы бойынша 1 618 ұпай жинады. Ойыншы екі рет турды үш таңбалы көрсеткішпен аяқтады – 5-турда (100) және 7-турда (108). Ал ең сәтсіз туры – 4-ші, онда маусым жеңімпазы бар болғаны 47 ұпай еншіледі. Енді Plescavica_Team құнды сыйлықтың иегері атанады – iPhone 15.

Екінші орынды Mamontov иеленді – оған чемпионмен теңесуге небәрі төрт ұпай жетпеді (1 614). Оның ең табысты туры – 7-ші, ол кезде 141 ұпай жинады. Ең төмен нәтиже 18-турда тіркелді – небәрі 51 ұпай. Mamontov-тың жүлдесі – PlayStation 5 ойын консолі.

Ал үшінші орынға табан тіреген V26 пайдаланушысы Xbox Series X консолін иеленеді. Оның ең нәтижелі туры – 20-шы (95 ұпай), ал ең сәтсізі – 2-ші (44).

Сондай-ақ үздік ондыққа енген ойыншылар да назардан тыс қалмайды – олар Лиганың фирмалық атрибутикасын иеленеді. Еске сала кетейік, әр турда ең үздік құрам жасақтаған фэнтези-менеджерлер COPA.KZ серіктесінен 20 000 теңгелік сертификат ұтып алған болатын.

Айта кету керек, турнир тарихындағы ең жоғары нәтижелі тур құрамын Grushevskiy жасаған – оның командасы 7-турда 145 ұпай жинаған.

Сондай-ақ Болжамдар лигасының қорытындысы да шығарылды. Маусым жеңімпазы – Al1khannn, ол Galaxy Tab A9 иегері атанады. Ал екінші және үшінші орын алған liya мен VladimirDertsap қатысушыларына Xiaomi смарт-білезігі табысталады.

Freedom QJ League өкілдері жүлделі орын иегерлерімен жақын уақытта байланысады.